Inundasaun iha Tasi-tolu, Dili, domingu (04/04/21). Imajen Tatoli/António Gonçalves.

DILI, 15 abríl 2021 (TATOLI)–Rezisténsia Nasionál Estudante Timor-Leste (RENETIL) planeia entrega dokumentu observasaun ne’ebé halo ona kona-ba medida prevensaun surtu COVID-19 iha Timor-Leste no rekuperasaun ba estragu impaktu hosi dezastre naturál ne’ebé akontese foin lalais ba Governu liuhosi Primeiru-Ministru (PM), Taur Matan Ruak.

Tanba ne’e, entidade RENETIL ne’ebé lidera hosi Sekretáriu Jerál RENETIL,  Joaquim Fonseca, hasoru malu ho Xefe Governu iha Palásiu Governu hodi ko’alia pasu sira ne’ebé mak Governu halo ona ba kestaun nasionál rua ne’e.

“Ami halo audiénsia ho Primeiru-Ministru atu intende di’ak liután kona-ba pasu sira mak Governu hola hasoru COVID-19 no haree oinsá apoiu ba komunidade hodi rekupera hosi dezastre naturál ne’ebé akontese foin lalais. Ami mós relata ba Primeiru-Ministru katak daudaun ne’e departamentu estudu estratéjiku RENETIL prepara hela dokumentu ne’ebé sei hato’o ba Governu hanesan kontribuisaun organizasaun iha prosesu kombate COVID-19 no inundasaun,” Sekretáriu Jerál RENETIL, relata hafoin hasoru malu ho PM Taur, kinta ne’e.

Durante hasoru malu, RENETIL fó hanoin balun relasiona ho prevensaun COVID-19 iha Timor-Leste inklui dezastre naturál.

“Dokumentu ne’e ami sei hato’o hanesan RENETIL nia observasaun kona-ba Governu ninia resposta ba COVID-19 no oinsá Governu hasoru konsikuénsia ekonómiku ne’ebé mak mosu medida sira ne’ebé prevee hodi kombate surtu iha Timor-Leste,” nia akresenta.

Aleinde ne’e, organizasaun ne’e fó hanoin balun kona-ba rekuperasaun dezastre naturál, ne’ebé la’ós rekuperasaun ekonómika de’it maibé kuaze atu harii hikas fali moris tanba ema balun kuaze lakon buat barak.

“Primeiru-Ministru apresia RENETIL nia vontade atu kontinua fó hanoin ne’ebé kontribui ba prosesu dezenvolvimentu no mós hein bainhira ami konklui ona dokumentu ne’e entrega ba Governu,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here