Ministru Justisa, Manuel Cárceres da Costa ho Administradór Postu Administrativu Laclo, Samuel Rodrigues Pereira (faru riskadu). Imajen Tatoli/Arminda Fonseca

MANATUTO, 15 abríl 2021 (TATOLI)-Ministru Justisa, Manuel Cárceres da Costa, kinta (15/04), fó apoiu nesesidade báziku ba vítima dezastre naturál iha Postu Administrativu Laclo, Munisípiu Manatuto.

Notísia Relevante : Rekuperasaun dizastre naturál, PM orienta membru Governu foku ba atuasaun

 “Mai nu’udár Laclo-oan no ha’u mai reprezenta mós Laclo-oan sira-nian no ba belun-sira ne’ebé solidariza ami, fó netik sasán ajuda uitoan ba ami-nia maluk sira ne’ebé iha Laclo ne’e,  tanba liuhosi tulun sira-ne’e, bele hakmaan ami-nia maluk-sira ne’ebé afetadu ba inundasaun dezastre naturál iha semana ida liubá,” Ministru Justisa, Manuel Cárceres da Costa, hateten ba Jornalista sira iha Salaun São Vicente Perrer Laclo, Manatuto.

Sasán nesesidade báziku ne’ebé fó apoiu ba vítima sira iha Laclo, hetan  mós apoiu  hosi Governu liuhosi Centro Logístico Nasionál (CLN) no Ministériu Koordenadór Asuntu Ekonómiku.

“Iha biban ne’e mós, ha’u aproveita oportunidade hakarak agradese ba Governu liuhosi Sentru  Lojístiku Nasionál, no Ministériu Koordenadór ba Asuntu Ekonómiku (MKAE) ne’ebé simu ha’u-nia pedidu hanesan Laclo-oan ida tulun mós foos balu tau hamutuk lori mai Laclo,” Ministru Manuel Cárceres da Costa hateten.

Antes lori apoiu nesesidade báziku ba Postu Administradór Lalco,  MJ liuhosi Manatuto fó apoiu mós nesesidade báziku balun ba Postu Administrativu Manatuto-Vila.

Notísia Relevante : Xefe Suku Lacu-Mesak husu Governu normaliza Mota Laclo

Nesesidade báziku ne’ebé Ministériu Justisa lori ba fó apoiu ba vítima sira  mak hanesan, foos saka 490, supermi kaixa 159, mina kaixa 10, no ikan lata kaixa 10.

“Apoiu sira ne’ebé ha’u lori mai agora entrega  ba Amu pároku, Administradór no Xefe Suku na’in-lima hosi Postu Administrativu Laclo nian, mak sira fahe ba vítima-sira tanba sira mak hatene liu vítima-sira,” Manuel Cárceres hateten.

Administradór Postu Administrativu Laclo, Samuel Rodrigues Pereira hateten, nu’udár Laclo-oan orgullu no agradese ba Laclo-oan sira ne’ebé buka moris iha Dili, bele fó apoiu nesesidade báziku ba vítima dezastre naturál.

Komunidade Laclo ne’ebé afeta ba dezastre naturál ne’e tuir dadus provizóriu uma-kain hamutuk 272.

“Tanba ne’e apoiu ne’ebé daudaun ne’e ami hetan ona ba oin ami sei fahe ba vítima sira. Tanba antes ne’e  Caritas hosi Dioseze Baucau mak fó uluk apoiu uitoan, maibé apoiu sira ne’e lato’o,” Samuel Rodrigues Pereira informa.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here