Logo-tipu PDHJ

DILI, 15 abríl 2021 (TATOLI)—Provedoria Direitu Umanu no Justisa (PDHJ), husu ba líder-sira, membru órgaun soberania, instituisaun públika ho seguransa, ne’ebé iha responsabilidade atu asegura Estadu,  presija fó-sai mensajen ne’ebé enkoraja públiku no evita mensajen ameasa ba violasaun direitu umanu.

“PDHJ husu ba líder-sira atu evita fó-sai mensajen ba públiku ho ameasa ba violasaun direitu umanu,” PDHJ husu liu hosi komunikadu ne’ebé Agência Tatoli asesu, kinta ne’e.

Notísia relevante:PDHJ arrola ona keixa oknum polísia basa pesoál Saneamentu

Komunikadu ne’e subliña katak, presija liu mak mensajen ne’ebé enkoraza podér públiku, hanesan forsa armada, polísia no forsa seguransa-sira, atu la’o tuir kritériu legál, hodi tane aas direitu fundamentál ne’ebé garantidu no labele rezulta responsabilidade kriminál.

PDHJ nu’udár órgaun independente ida, ne’ebé iha funsaun atu apresia no buka dalan hodi atende sidadaun sira-nia kesar hasoru podér públiku, bele hare atu ida-idak la’o tuir lei, prevene injustisa no hala’o prosesu hodi hadi’a injustisa.

PDHJ mós iha obrigasaun atu fó hanoin ba podér públiku, espesialmente ba forsa armada, polísia no forsa seguransa sira-seluk ne’ebé iha responsabilidade ba fiskalizasaun kumprimentu ba regra-sira.

Instituisaun ne’e  rekoñese mós gravidade hosi krize saúde, kauza hosi surtu COVID-19, no rekoñese katak Estadu tenke foti medida-sira hodi responde ba kalamidade públika ne’ebé Timor-Leste hasoru, maibé medida-sira ba prevensaun tenke nesesáriu no proporsionál.

“Fó hanoin katak, direitu ba vida no integridade fízika la hetan limitasaun durante Estadu emerjénsia.  Uza forsa hosi forsa seguransa tenke nesesáriu atu foti asaun legál relevante no bele de’it uza forsa natón atu hamate risku ba ema seluk-nia integridade fízika ka moris. Podér públiku atua ho forma profisionál no halo tuir rejime jurídiku uza forsa (DL 43/2011),” subliña.

Durante Estadu emerjénsia, PDHJ kontinua monitoriza no sei prontu nafatin denunsia abuzu-sira ba direitu umanu, kna’ar ida ne’ébé konsidera importante liu, partikularmente iha tempu surtu COVID-19 ne’ebé fó ameasa ba saúde públika.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here