Grupu defisiénsia-matan vizita líder nasionál Kay Rala Xanana Gusmão iha sentru izolamentu Vera Cruz. Imajen Tatoli/Felicidade Ximenes.

DILI, 15 abríl 2021 (TATOLI)—Grupu defisiénsia-matan reprezenta hosi ema na’in-lima ne’ebé ohin tuku 10:00, ba vizita líder nasionál Kay Rala Xanana Gusmão iha sentru izolamentu  Vera Cruz, husu Governu atu buka lalais solusaun ba situasaun ne’e.

Maluk defisiente hirak-ne’e husu tanba, oras ne’e mundu enfreta hela surtu COVID-19, no sira lakohi atu Kay Rala Xanana Gusmão ne’ebé idade avansadu ona, toba bebeik iha estrada, liuliu iha rai-rahun laran, bele provoka moras ba saúde.

Notísia relevante:Xanana Gusmão kontinua toba hein desizaun Governu

”Ami defisiénsia-matan lakohi tane ida no hatún ida, tanba ne’e ami husu líder-sira tuur hamutuk hodi buka solusaun ba problema ne’e,” Reprezentante Grupu defisiénsia-matan, Grabiel Paixão de Sousa, hateten ba jornalista-sira iha sala izolamentu Vera Cruz, kinta ne’e.

Grabiel Paixão de Sousa esplika, durante loron haat ona, sira akompaña iha média kona-bá asaun ne’ebé Kay Rala Xanana Gusmão halo, nune’e ohin hakat-mai iha fatin ne’e atu bele hasoru direta ho líder karismátiku ne’e.

Nune’e, Kay Rala Xanana Gusmão, hato’o obrigadu ba prezensa hosi Grupu defisiénsia-matan, hamutuk na’in-lima iha fatin ne’e.

”Obrigado barak ba imi, problema ne’e ita hotu-nian no imi mai to’o iha-ne’e hatudu imi-nia fuan boot tebtebes. Haku’ak boot ba imi hotu,” Xanana Gusmão hateten ho haku’ak maluk defisiente na’in-lima ne’e.

Ohin, tama ona ba loron haat, Kay Rala Xanana Gusmão hamutuk ho família matebian Armindo Borges ne’ebé mate ho COVID-19, hodi kontinua hein desizaun Governu ba destinu mate-isin, tanba família hakarak haloot tuir kultura Timór-nian.

Hafoin reuniaun KM iha 14 abríl, Ministru Prezidénsia Konsellu Ministru, Fidelis Manuel Leite Magalhães, hateten, situasaun ne’ebé akontese iha Vera Cruz hanesan asuntu tékniku, ne’ebé entidade-sira hetan delegasaun kompeténsia hosi membru Governu, liuliu Primeiru Ministru (PM), Taur Matan Ruak hanesan Komandante Operasionál iha Sala Situasaun Sentru Integradu Jestaun Krize (SIJK) mak bele pronúnsia.

Tuir observasaun, situasaun atuál iha sentru izolamentu Vera Cruz kontinua kontroladu  tanba hetan seguransa másima hosi PNTL.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here