Hakerek nain, Guteriano Neves.

Hosi:

Guteriano Neves

Pandemia globál kauza hosi COVID-19 nu’udar realidade saúde públika ida; maibé iha dimensaun oioin. aspetu sosiál no ekonomia nian, medida saúde públika ne’ebé opta hamosu krize ekonomia ida ne’ebé boot no komplexu tebes, no nunka akontese iha istória umanidade nian durante sékulu ida ne’e. Ida ne’e manifesta iha kontrasaun ekonomia mundiál, indústria barak mak lakon sira nia rendimentu, empreza barak mak taka, ema barak mak lakon empregu no rendimentu, no númeru pobreza aumenta.

Tanba virus Corona da’et liu hosi ema, medida saúde públika  ne’ebé rekomenda no país barak uza iha mundu mak limita ema nia movimentu fiziku liuhosi Lockdwon ka Konfinamentu Obrigatóriu. País barak implementa medida ida ne’e durante 2020, nune’e, tinan 2020 koñesidu iha istória umanidade nian nuudar “The Great Lockdown.” Medida ne’e bandu no limita ema atu halo movimentu, labele halo ferias, la halo viajen ba rai liur, hapara eskola, bandu ba bar no diskoteka sira, atividade relijioza no kultural sira. Sira ne’e simplizmente kontra ema nia liberdade; liliu liberdade atu halo movimentu; nune’e naturalmente hamosu rezisténsia.

Infelizmente, konfinamentu obrigatóriu impoen kustu ida ne’ebé aas tebes; lori provoka krize ekonomia no sosiál ida komplexu no grave tebes ne’ebé mundu nunka hasoru dezde Great Depression iha 1930 e tal. Fundu Monetáriu Internasionál (FMI) – no Banku Dezenvolvimentu Áziatiku – Asian Development Bank (ADB) – karakteriza krize ida ne’e nu’udar krize foun ida iha tinan 100 ida nia laran. FMI  bolu krize “A crisis like No other, an Uncertain Recovery.” Ida ne’e atu hateten COVID-19 provoka krize ekonomia ida ne’ebé diferente hosi krize seluk ne’ebé mundu hasoru ona iha sékulu ida ne’e; no seidauk serteza kona-ba rekuperasaun. Indikadór makro-ekonomia nian hatudu kona-ba kebra  ka kreximentu negativu ekonomia mundiál kauza hosi COVID-19.

Estimasaun FMI nian iha fulan fulan Outubru 2020 hatudu katak ekonomia mundiál hetan kontrasaun ho kreximentu -4.4 pursentu no argumenta katak krize ida ne’e aat liu dezde Great Depression iha 1930s. Atu tau iha kontextu, krize finanseiru 2009 nian kauza ekonomia mundiál monu -1.6 pursentu. Ekonomia avansadu sira esperénsia konstrasaun ho kreximentu -5.8 pursentu; bainhira país sira ho ekonomia emerjente esperénsia kreximentu -3.3 pursentu.

Konfinamentu obrigatóriu hamosu disrupsaun boot ida iha kadeia abastesamentu mundiál nian – Globál Supply Chain –; implika ba siklu produsaun, distribuisaun no konsumu sasan no servisu iha mundu tomak. Hosi lidun prokura nian – demand side – limitasaun ba movimentu kauza prokura sasan no servisu iha merkadu nasionál no internasionál tun drastikamente. Bandu no limitasaun ba atividade divertimentu durante konfinamentu obrigatóriu signifika katak iha kebra boot ida iha prokura ba servisu sira iha setór ospitalidade no divertimentu sira hanesan otél, bar, diskoteka, no restorante sira.  Hosi lidun oferta nian – supply side –konfinamentu bandu ema atu halibur malu númeru barak, implika ba indústria barak iha mundu, liliu indústria sira ne’ebé intensivu iha traballadór ou presiza traballadór barak – Labor Intensive Industry.

Turizmu, setór importante ba ekonomia mundiál. Tuir World Travel and Tourism Council, turizmu no viajen – Travel and Tourism diretamente no indiretamente kontribui ba 10.3 pursentu ba PIB mundiál, 6.8 pursentu hosi esportasaun mundiál, 28.3 pursentu hosi esportasaun servisu mundiál no empregu hamutuk tokon 330. Maski nune’e, dadus hosi United Nations World Tourism Organization  (UNWTO) kompara ho 2019, númeru ema ne’ebé halo viajen hanesan turista  – International Tourist Arrivals – iha 2020 tun 74 pursentu no lakon totál $1.3 trillion. Iha Rejiaun Ázia Pasifika, ema ne’ebé halo viajen hanesan turista tun to’o 80 pursentu; kompara ho 76 pursentu iha rejiaun Médiu Oriente, 71 pursentu iha Eropa, 70 pursentu iha Áfrika no 69 pursentu iha kontinente Amérika.

Númeru turista iha país ASEAN nian hanesan; Filipina, Singapora, no Tailándia hetan konstrasaun 84 pursentu. Kebra iha númeru turista internasionál impaktu mós ba indústria aviasaun no otelária. Dadus hosi organizasaun International Air Transport Agency (IATA) karakteriza 2020 nuudar tinan katastrofia ba indústria aviasaun, no tinan mais pior liu hotu – worst year – iha esperénsia indústria refere. Kompara ho 2019, prokura ba pasajeiru internasionál tun 75.6 pursentu; no prokura doméstika tun 48.8 pursentu. Nune’e mós númeru ema ne’ebé halo reserve iha otél kada semana tun drastikamente; iha país sira hanesan Fransa, Estadus Unidus, Brazíl, Fransa, Tailándia, no sira seluk. Indústria fa’an sasan nian ka Retailer industry mós sofre, no tuir Ajénsia Notísia BBC, kompara ho fulan-janeiru 2020, ema ne’ebé halo kompras iha fulan-janeiru 2021 tun 97 pursentu iha Alemaña, 78% iha UK, 67% iha Italia; 65 pursentu iha Kanada no Fransa.

Siklu ida ne’e tuir mai impaktu ba ema nia kualidade moris; liu hosi empregu no rendimentu no mós pobreza. Estimasaun no analiza hosi organizasaun International Labor Organization, katak iha 2020, COVID kauza disrupsaun boot ida ne’ebé nunka akontese iha merkadu traballu internasionál.  Durante 2020, oras servisu ne’ebé lakon – working-hour losses – to’o 8.8 pursentu; ekivalente ho tokon 114 empregu. Em totál, tuir ILO, trilliun $3.7 hosi rendimentu traballadór mak lakon iha 2020; boot liu dala haat kompara ho krize finanseiru 2009 nian.

Nune’e iha redusaun partisipasaun forsa traballu mundiál no aumenta taxa dezempregu mundiál hosi 5.4 pursentu iha 2019 ba 6.5 pursentu iha 2020. Taxa dezempregu iha país dezenvolvidu sira aumenta maka’aas. Iha EUA, dezempregu sa’e hosi 3.7 pursentu iha 2019 ba 8.9 iha 2020; dezempregu iha Kanada aumenta hosi 5.7 pursentu iha 2019 ba 9.7 pursentu iha 2020; Reinu Unidu aumenta hosi 3.8 pursentu iha 2019 ba 5.8 iha 2020. Rendimentu setór informál nian mós drastikamente tun, no tuir estimasaun ILO nian iha fulan-abríl 2020 katak rendimentu setór informál nian tun 60 pursentu. Nivel pobreza mós aumenta iha mundu no tuir Banku Mundiál, COVID-19 sei dudu tan ema entre tokon 88 to’o 115 ba pobreza estrimu; katak rendimentu menus hosi $1.9/loron.

Dadus sira ne’e atu hatudu nivel komplexidade no grave hosi krize ida ne’ebé mundu enfrenta hela iha aspetu sosiál no ekonomia nian tanba COVID no konfinamentu obrigatóriu. Krize ida ne’e grave tanba akontese iha mundu tomak, independentimente hosi nivel dezenvolvimentu ekonomia. Ho integrasaun no interdependensia ekonomia mundiál, esforsu nasaun ida nian sei la rezolve; maibé sei depende mós ba dinamika iha país sira seluk. Nune’e mós komplexu tanba virus ida ne’e kauza emerjénsia iha saúde públika nian; no medida saúde públika ne’ebé opta hamosu fali impaktu ekonómiku ida ne’ebé boot tebes; boot liu krize sira hanesan 2009 no 1990 – e tal nian. Tanba kustu ne’ebé involve ka kauza sosio ekonómiku aas tebes, la’os ema uitoan mak kestiona proporsionalidade medida saúde públika nian.

Maski krize ida ne’e krize mundiál, ninia impaktu ba kada país depende mós ba kontextu ne’ebé existe antes de COVID. Ida ne’e inklui kapasidade sistema saúde públika atu responde, reziliênsia ekonómiku, nivel dizigualidade ekonómiku no injustisa sosiál, kapasidade governasaun nian, no sistema polítika rasik.

Timor-Leste klaramente labele evita situasaun ne’e no manifesta iha problema sira ne’ebé durante ne’e povu enfrenta hanesan ema hamlaha, ema lakon rendimentu, setór privadu barak mak taka sira nia negosiu nune’e hapara traballadór sira, no problema seluk tan. Impaktu ida ne’e hetok dudu liu tan grupu vulneravel sira ba nivel pobreza nian no inseguransa alimentár. Por ezemplu iha situasaun ne’ebé ema hamlaha no sira nia konsumu depende totalmente ba rendimentu kada loron, konfinamentu obrigatóriu sei impaktu diretamente ba sira nia konsumu lor loron.

Bainhira sira enfrenta situasaun refere, iha tendénsia atu reziste medida saida de’it mak impaktu direita ba sira nia rendimentu no konsumu. Iha país ne’ebé lejitimidade Estadu nian fraku no sidadaun menus konfiansa ba instituisaun Estadu, sira sei la dun fiar nune’e iha tendénsia atu resiste medida sira ne’e. Sa tan iha kontextu ida ne’ebé mídia sosiál sai instrumentu atu partilla informasaun sira ne’ebé la kredivel no la verifika.

Timor-Leste desidi atu halo konfinamentu obrigatóriu lori limita movimentu ema nian bainhira deteta kazu primeiru liu hosi deklarasaun “Estadu Emerjénsia (EE)” iha tinan kotuk. Inísialmente, EE fó kobertura legál ba Governu atu halo kuarentena obrigatóriu ba sira ne’ebé tama mai Timor no sira ne’ebé hetan no hada’et virus ne’e. Medida refere klaramente fó liu importansia atu salva saúde públika no ema nia vida duke ekonomia. Opsaun atu salva sistema saúde no salva ema nia moris nuudar opsaun polítika ida ne’ebé Primeiru Ministru rasik opta no defende publikamente bainhira deklara “salva uluk ema nia vida depois mak salva ekonomia.” Iha aspetu saúde públika nian, estratejia Governu nian, to’o agora konsege salva sistema saúde públika hosi situasaun katastrofia. To’o fulan rua kotuk, kazu ne’ebé Timor rejista hotu hotu kazu importadu, no barak liu deteta iha kuarentena nia laran. Foin to’o fulan-marsu mak Timor-Leste deteta kazu barak iha komunidade nia leet; to’o ohin loron, Timor-Leste rejista ona kazu kumulativu mais mil e tal.

Infelizmente, konsidera nivel dezenvolvimentu atuál Timor-Leste nian, no kondisaun pre-existente, medida saúde públika ne’e agrava liu tan ou halo pior liu tan kondisaun sosio-ekonómiku populasaun nian. Konfinamentu ne’ebé implementa iha fulan rua dahuluk halo ekonomia paradu totál. Ida ne’e aumenta tan ba recessaun ekonomia ne’ebé Timor-Leste hetan ona iha 2017 no 2018; refleta iha kreximentu negativu tanba inserteza polítika no laiha orsamentu apropriadu.

Tuir ADB, iha 2020, Timor-Leste fila fali ba resesaun ekonomia ho taxa kreximentu -6.3 pursentu. Entre país ASEAN nian, so Filipina ho Tailándia de’it mak kontrasaun ekonomia boot liu Timor-Leste – kreximentu ekonomia Filipina nian -7.3% no  Tailándia – 8.0 pursentu. Kontrasaun ida ne’e boot liu iha era independensia nian, no boot liu kontrasaun ekonomia mundiál nian. Inundasaun no rai monu ne’ebé foin dadaun akontese no harahun uma, to’os no plantasaun agrikola sira, no infraestrutura xavi sira sei dudu ekonomia Timor-Leste tun liu tan. Ida ne’e situasaun ida ne’ebé Timor-Leste nunka hasoru iha ninia istória dezde ukun rasik án.

Iha tempu hanesan, indikadór sosiu ekonómiku oioin hatudu nivel vulnerabilidade iha aspetu sosiál no ekonómiku antes COVID. Ida mak taxa pobreza aas (42 bazeia ba konsumu no 48 pursentu bazeia ba pobreza multidimensional);  no pobreza iha rurál relativamente aas liu kompara ho urbana. Iha dizigualidade ekonómiku no injustisa sosiál iha ne’ebé dezenvolvimentu durante ne’e fó benefisiu liu ba área urbana, partikularmente Dili, kompara ho munisípiu seluk. Metade hosi populasaun ho idade produtivu mak la partisipa iha merkadu traballu, barak liu hosi ne’e mak eskola hela, no depende ba inan aman no família sira. Aumenta tan, mais de 60 pursentu hosi empregu ne’ebé iha mak auto-empregu ka empregu iha setór informál. Karakteristiku importante ida hosi setór informál mak sira laiha kobertura hosi seguransa sosiál no sira nia rendimentu la estavel. Empregu uitoan ne’ebé kria hosi setór privadu mós barak liu konsentra iha indústria fa’an sasan nian no konstrusaun; no sira ne’e hotu depende ba despeza setór publiku. Iha tempu hanesan, dadus hosi diresaun estatistika nasionál hatudu katak empregu iha setór privadu tun no dezde 2017 kauza hosi resezaun ekonómika.

Krize ho nivel komplexidade hanesan mundu enfrenta hela dadaun komplika mós maneira oinsá Governu responde. Governu iha fatin barak responde ba kalamidade saúde públika no krize ekonómiku ne’ebé mósu ho medida oioin. Iha nivel estratejiku, existénsia medida sosiál no ekonómiku iha kontextu pandemia globál mak atu haforsa liu tan medida saúde públika nian. Ho liafuan seluk, protesaun sistema saúde públika mak sai alvu prinxipal; no medida sosiu ekonómiku hola parte iha esforsu Governu nian atu minimiza risku no impaktu negativu ne’ebé mósu tanba konfinamentu obrigatóriu.

Bazeia ba ninia alvu, medida sira ne’e bele kategoriza ba tolu: proteze saúde públika, proteze traballadór sira, proteze empreza sira no mós proteze grupu vulneravel sira. Instrumentu prinxipal sira ne’ebé uza atu lori finansa mak instrumentu fiskál no mós instrumentu monetáriu. Indonezia por ezemplu, Governu altera ninia regras fiskál, partikularmente plafon ba defisit fiskál no regras ba divida públika lori fó flexibilidade ba Governu atu responde ba COVID no impaku sosiál no ekonómiku ne’ebé mósu. Iha 2020, Indonezia adopta ona pakote fiskál haat (4) tutuir malu lori haforsa sistema saúde no mòs proteze sidadaun sira iha aspetu sosiál no ekonómiku. Iha Nova Zelandia atu komplementa ninia intervensaun iha parte saúde públika nian, Governu adopta pakote estimulus ida ho valor Billaun NZ$12.1; ou ekivalente Billaun US$ 4.8. Ida ne’e nuudar pakote fiskál ida ne’ebé boot liu iha istória Nova Zelandia nian durante tempu paz.

Tuir mai, Governu adopta tan pakote fiskál ho montante Billaun NZ$50 ekivalente ho billaun US$34.8 lori responde ba COVID no rekopera ninia ekonomia longu prazu nian. Iha Japaun, iha 2020 nia laran, Governu aprova pakote fiskál haat atu hatan ba COVID no impaktu sosio ekonómiku ne’ebé mósu. Estadus Unidus foin dadauk mós aprova pakote fiskál ida ne’ebé boot liu iha istória EUA nian ho montante trilliun $1.9 lori responde ba COVID.

Kompara ho país seluk, medida polítika públika sira ne’ebé Timor opta em jeral la ses dook hosi medida sira ne’ebé uza iha país barak. Tanba Timor-Leste laiha instrumentu polítika monetária nian, polítika fiskál mak sai dalan uniku ba Governu atu halo intervensaun. Implementasaun serka sanitária ba fulan rua dahuluk tuir kedan ho pakote normalizasaun ekonómiku, no protesaun sosiál nian.

Pakote normalizasaun ekonomia la’os intende atu rekopera ekonomia, maibé fó liu importansia ba konsumu uma kain nian. Ida ne’e fó biban ba Governu atu prepara planu rekoperasaun ekonómiku ba tempu naruk nian. Planu Rekuperasaun Ekonomia (PRE) ne’ebé prepara hosi Komisaun Rekuperasaun Ekonómiku no aprova hosi Konsellu Ministru iha fulan Agostu estabelese medida kurtu prazu no longu prazu ba rekuperasaun ekonomia. Medida kurtu prazu mak programa Cesta Bazika. Ba tempu naruk nian, PRE propoin ba re-estruturasaun ekonomia Timor-Leste nian, liu hosi investimentu iha setór ekonomia hanesan agrikultura, turizmu no manufatureira. PRE haforsa tan urjensia ba diversifikasaun ekonomia. Medida sira ne’ebé rekomenda hosi Komisaun tuir mai integra iha orsamentu annual Governu nian no hola parte iha planu asaun annual Governu nian.

Medida sira ne’ebé Timor-Leste opta iha 2020, estabilidade polítika, no aprovasaun OJE 2021 nian hahoris sensu de normalizasaun ekonomia. Estudu hosi Oxfam no MDI kona-ba setór informál fó sai katak iha aumentu iha rendimentu iha setór informál nian depois de subsidy. Sondajem hosi Fundasaun Ázia nian mós hatudu kona-ba nivel satisfasaun ba subsidiu eletrisidade nian, Cash Transfer; maski hanesan Banku Mundiál nota katak, tarde iha intervensaun, no kapasidade administrativa no tekniku sai impedimentu ba iha implementasaun. Aprovasaun OJE 2021 nian restora fali konfiansa ba ekonomia; refleta iha projeksaun katak ekonomia Timor-Leste nian sei fila fali ba trend kreximentu pozitivu.

Independentimente hosi kreximentu ekonómiku, problema sosiál no ekonomia oioin ho karakteristiku estrutural hanesan Timor-Leste enfrenta hela sei presiza solusaun sistematiku no estrutural. Ida ne’e implika katak servisu barak tenki orienta ba mudansa iha estrutura ekonomia, reorientasaun investimentu publiku sira, no mudansa iha kuadramentu instituisaun nian sira. Sira ne’e hotu hola parte iha PRE. Iha tempu hanesan COVID kontinua hamosu inserteza boot ida iha ekonomia mundiál.

Maski projeksaun oioin ne’ebé mai hosi organizasaun internasionál sira pozitivu katak tendensia kreximentu atu fila ba pozitivu, maibé iha mós rekonhesementu kona-ba inserteza boot ida kauza hosi COVID. Hanesan Relatoriu Banku Mundiál kona-ba ekonomia Timor nian nian fó sai, konsidera nivel komplexidade hosi krize ida ne’e, ninia durasaun, lala’ok virus ne’e, kondisaun pre-existenti, no dinamika polítika internal; normalizasaun no rekuperasaun ekonomia sei neneik no han tempu.

Nune’e, sei susar atu rekupera fali empregu no rendimentu ne’ebé lakon, no mós empreza ne’ebé taka. Dizastre naturais ne’ebé foin akontese dadaun komplika no difikulta liu tan Governu atu implementa ninia programa sira no medida saúde públika atu kontrola COViD. Dezastre naturais ne’e halo Governu atu foti medida sira lori flexibiliza konfinamentu obrigatóriu; nune’e bele iha estimasaun ida katak númeru COVID sei aumenta maka’aas iha fulan Maiu hanesan ne’e.

Krize ida ne’ebé mundu enfrenta hela komplexu no grave tebes, nune’e sei la fasil atu ultrapasa. Ho vasinasaun ne’ebé lao hela iha mundu, mundu karik bele kontrola lalaok virus ne’e; Konsidera ita nia kondisaun pre-existenti sira antes COVID nian, Timor-Leste karik sei bele ultrapasa

Deskrisaun sira iha leten nia objetivu atu hatoo kona-ba komplexidade hosi no inserteza hosi krize ne’ebé mundu enfrenta hela, nune’e bele sai referensia ba sosiedade tomak kona-ba nivel grave hosi krize ida ne’e. No Dezastre naturais ne’ebé foin dadaun aumenta tan naha todan ne’ebé populasaun Timor-Leste lori hela, kauza hosi estrutura ekonomia no sosiál ne’ebé existe antes, inserteza polítika, COVID no Lockdown.

Autór nuudar analista polítika públika

PUBLISIDADEiklan

HAKEREK NO HATÁN

Please enter your comment!
Please enter your name here