Fatin izolamentu pasiente COVID-19, iha Tasi-tolu, Dili. Imajen TATOLI/António Gonçalves

LIQUIÇA, 15 abríl 2021 (TATOLI) – Administradór Munisípiu Liquiça, Domingos da Conceição dos Santos, apela ba komunidade Liquiça ne’ebé detetadu pozitivu COVID-19 tenke koopera ho ekipa saúde hodi bele lori ba sala izolamentu Dili.

Notísia Relevante : Liña frente iha Liquiça simu vasina AstraZeneca

“Ha’u simu ona informasaun hosi ekipa saúde-sira katak ita-nia pozitivu COVID-19 hamutuk haat (4), maibé balu seidauk koopera ho ekipa saúde. Ami koordena ona ho Polísia atu ba foti, tanba kuandu ita husik livre hela bele nakda’et barak ona,” Domingos dos Santos hateten ba Agência Tatoli iha Liquiça, kinta ne’e.

Nia  hatutan, se abitante pozitivu  COVID-19 lakohi koopera ho ekipa saúde maka fó risku ba sosiedade no bele prejudika komunidade nia vida.

“Di’ak liu maka ita tenke antesipa sedu duke ita husik. Ha’u apela nafatin ba abitante-sira bainhira deteta katak hetan ona moras ne’e entrega-an ba ekipa saúde sira,” nia afirma tan.

Daudaun ne’e Munisípiu Liquiça rejistu ona pozitivu COVID19 hamutuk ema na’in-hotu (7) no agora submete ona ba Sala Izolamentu  iha Dili.

Jornalista   : Hortencio Sanchez  

Editór        : Francisco Simões

HAKEREK NO HATÁN

Please enter your comment!
Please enter your name here