Movimentu komunidade área Masin-Lidun utiliza bero, hafoin inundasaun iha 04 abríl. Imajen Tatoli/Eugénio Pereira.

DILI, 14 abríl 2021 (TATOLI)-Abitante sira iha Masin Lidun, Tasitolu agradese esforsu kompañia internasionál WIKA, Incanto Weste no Timor Port tanba hamenus ona bee iha lagoa Tasitolu, hafoin inundasaun semana kotuk.

“Ami sente iha progresu uitoan, tanba bee komesa redús no komunidade balun ne’ebé hela iha área rai ne’ebé aas komesa hamoos fila-fali sira nia uma,” Afonso José ba jornalista sira iha Masin Lidun, kuarta ne’e.

Notísia relevante:Xanana mobiliza kompañia lori mangeira hasai bee iha Lagoa Tasi-Tolu

Tuir abitante ne’e, bee kuandu menus, ajuda tebes sira-nian atividade lorloron nian.

Inundasaun ne’ebé akontese iha domingu dauluk fulan-ne’e halo volume bee lagoa Tasitolu sa’e maka’as to’o hoban uma hamutuk 280-liu hodi obriga abitante 620-liu evakua ba parte foho-lolon.

Iha fatin hanesan, Atino Barros abitante Masin Lidun, agradese ba kompañia no inisiativa lider karismátiku, Xanana Gusmão, ne’ebé lori mangeira xupa ona bee lagoa hodi halo fasil sira fila ba uma hodi hamoos hela fatin.

Ekipa tékniku sira hosi Kompañia Internasionál WIKA, Incanto Weste no Timor Port monta ona mákina bomba bee hamutuk hitu hodi xupa sai bee iha lagoa sai ba área tasi.

La asesu ba saúde no bee-moos

Afonso José mós preokupa abitante balun moras, labele asesu ba saúde no bee-moos.

“Ami iha ne’e susar liu maka bee-moos no fasilidade saúde, tanba karreta seidauk bele halo movimentu ba mai,” nia preokupa.

Iha área tasi ibun Masin Lidun, Organizasaun Saúde Mundiál (OMS) monta ona tenda atendimentu provizóriu ida no tanke bee-moos ida ho kuantidade litru 2000, maibé la sufisiente atu fornese ba abitante na’in-620.

Tuir observasaun Agência Tatoli iha terrenu nota, komunidade balun ne’ebé hela iha área estrada parte foho-hun área Masin Lidun, no Bairro-Besi Mean, Aldeia 12 Outubru, Suku Komoro, Munisípiu Dili hahú hala’o ona atividade hodi hamoos sira nia hela fatin.

Jornalista : Eugénio Pereira

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here