IGE normaliza mota Terminál Becora, hafoin dezastre naturál domingu (04/04/21). Imajen espesiál.

DILI, 14 abril 2021 (TATOLI)—Dadus final ne’ebé lider komunitária sira iha aldeia 13 no suku tolu iha Postu Administrativu Metinaro, Munisípiu Dili, rekolla hatudu katak iha uma kain 295 mak afetadu ba dezastre naturál ne’ebé akontese iha domingu (04/04) foin lalais ne’e

Administradór Postu Administrativu Metinaro, Fausto Soares Dias informa, aban, tuir planu sei submete dadus finál kona-ba dezastre naturál ba Prezidente Autoridade Munisípiu Dili.

“Bazea prosesu levantamentu dadus kona-ba vítima inundasaun, ita iha Aldeia 13 no suku tolu (3) iha Postu Administrativu Metinaro ne’e, ita rekolla dadus finál vítima afetadu ba inundasaun ne’e hamutuk uma-kain 209. Aban dadeer, ita sei submete dadus final ne’e ba Prezidente Autoridade Munisípiu Dili,” Fausto Soares Dias hateten ba Agência TATOLI liuhosi telefónika, kuarta ne’e.

Administradór ne’e hateten, bainhira akontese dezastre naturál iha loron domingu foin lalais ne’e, nia parte foti desizaun halo kedas enkontru ho lider komunitária sira hodi kria ekipa task force ida oinsá atu haree ba vítima inundasaun sira-ne’e. 

“Hafoin ita enkotru kria ekipa task force iha nivél Postu Administrativu Metinaro, ha’u mak lidera tun ba, xefe suku to’o sefe aldeia sira mak sai lidera iha terenu. Entaun, sira tun ba terrenu halo levantamentu no verifikasaun dadus bazea ba formatu ne’ebé Ministériu Aadministrasaun Estatál (MAE) distribui,” nia dehan.

Entaun, nia hateten, hosi verifikasaun ne’e iha formatu tolu mak tenke prenxe mak formatu I kona-ba oinsá vítima sira-nia uma ne’ebé hetan estraga totál no kmaan, formatu II kona-ba dadus infraestrutura iha Suku ka Aldeia hanesan estrada, kanalizasaun bee-moos no seluk tan ne’ebé hetan estragu, no formatu III kona-ba setór privadu hanesan merkadu ka kioske sira-ne’ebé estragu hosi ciclone seroja ne’e.

“Bazea ba formatu I, II, III hosi Ministériu Administrasaun Estatál fó mai ami, ita-nia ekipa task force identifika hanesan Suku Wenunuc, formatu I iha vítima ne’ebé sira-nia uma estraga totál no estraga kmaan hamutuk uma kain 175, formatu II hamutuk 11, formatu III hamutuk ida (1). Suku Mantelolao formatu I hamutuk uma kain 103, formatu II hamutuk hitu (7), no formatu III hamutuk ida (1). Suku Sabuli, formatu I hamutuk uma kain 17, formatu II hamutuk lima (5), no format III zero. Entaun, totál komunidade afetadu hosi inundasaun ne’e hamutuk uma kain 295, formatu II totál hamutuk 23, no formatu III totál hamutuk rua (2),” nia informa.

Vítima ne’ebé afetadu ba inundasaun ne’e, nia dehan, daudaun ne’e sira evakua no refujia iha Igreja Protestante Alfa Bekiar iha Metinaro hamutuk uma kain 65.

“Ita-nia vítima hosi uma-kain 65 ne’ebé daudaun ne’e hela iha Igreja Alfa Bekiar Metinaro hosi suku rua; Manteloloa uma-kain 37 no Wenunuc uma-kain 28. Vítima sira seluk mantein hamoos sira-nia uma no agora hela fali iha sira-nia uma,” nia dehan.

Administradór ne’e haktuir, hafoin akontese dezastre naturál to’o agora, vítima dezastre naturál sira-ne’e hetan ona apoiu emerjénsia hosi Governu liuhosi Ministériu Administrasaun Eestatál no ema pesoál balun ne’ebé fó apoiu.

“Ita-nia komunidade hosi uma-kain 295 ne’ebé sai vítima ba inundasaun ne’e, balun hela iha uma no iha sentru evakuasaun sira-ne’e, hetan ona apoiu hosi Governu liuhosi Vise-Ministru MAE ne’ebé tun direta ba terenu hodi fó apoiu emerjénsia ba sira. Daudaun ne’e, sira nafatin fó apoiu nesesidade báziku mai iha sentru evakuasaun mak ita kontinua fó apoiu ba vítima sira,” Administradór ne’e hateten.

Jornalista: Arminda Fonseca 

Editór: Cancio Ximenes.

HAKEREK NO HATÁN

Please enter your comment!
Please enter your name here