Polísia kontinua fó seguransa másima iha sentru izolamentu Vera Cruz, Caicoli, Dili, segunda (12/04). Imajen TATOLI/Egas Cristóvão

DILI, 14 abríl 2021 (TATOLI)—Tama loron datoluk ona família matebian Armindo Borges hein iha sentru izolamentu pasiente COVID-19 iha Vera Cruz, hodi hein ekipa forsa-tarefa Sala Situasan-Sentru Integradu Jestaun Krize (CIGC, sigla portugés) hamutuk ho Ministériu Saúde (MS) entrega mate-isin ba família hodi haloot maibé to’o agora seidauk iha desizaun.

Portavós Governu no Ministru Prezidénsia Konsellu Ministru, Fidelis Manuel Leite Magalhães, konsidera asuntu ne’e hanesan tékniku, ne’ebé entidade sira hetan delegasaun kompeténsia hosi membru Governu mak deside, la’ós Konsellu Ministru (KM) mak deside.

“Asuntu ne’e tékniku kabe ba Sentru Integradu Jestaun Krize maka halo desizaun bazeia ba protokolu ne’ebé estabelese. Tanba ne’e, Sentru integradu Jestaun Krize no Primeiru-Ministru, Taur Matan Ruak rasik hanesan Komandante Operasionál iha Sala Situasaun maka bele pronúnsia informasaun asuntu espesífiku ida-ne’e,” Ministru Fidelis hateten hafoin ramata reuniaun ezekutivu, iha Palásiu Governu, kuarta ne’e.

Tuir governante ne’e, KM la halo desizaun ho natureza téknika maibé halo desizaun ho natureza polítika.

“Medida sira ne’ebé mak Governu hola bazeia ba rekomendasaun ténika hosi membru sira no ami rona de’it. Konsellu Ministru halo desizaun hafoin rona proposta hosi Sentru Integradu ne’ebé kompostu hosi pilár oin-oin hosi Ministériu Saúde,” nia esplika.

 Kona-ba mate-isin Armindo Borges, Ministru konsidera hanesan implementasaun protokolu saúde hosi CIGC.

Enkuantu, reuniaun KM ohin rona aprezentasaun hosi CIGC no halo desizaun kona-ba impozisaun serka sanitária iha munisípiu sira no alterasasaun dekretu Governu ba medida ezekusaun Estadu Emerjénsia.

Armindo Borges (47) hakotu iis iha domingu (11/04), tanba aleinde moras stroke, rezultadu teste swab ne’ebé ekipa saúde sira halo hatudu rezultadu pozitivu COVID-19, tanba ne’e ekipa forsa-tarefa hosi Sala Situasaun-CIGC no MS, asegura atu haloot mate-isin tuir protokolu saúde iha Metinaro.

Enkuantu, Líder karizmátiku, Xanana Gusmão, ne’ebé reprezenta família matebian, defende katak nia maluk hakotu iis tanba moras komplikasaun, ne’ebé la’ós tanba COVID-19, tanba ne’e husu atu hasai mate-isin hosi sentru izolamentu hodi entrega ba família no haloot tuir kultura Timór.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here