Aviaun Citilink. Imajen/Citilink

DILI, 14 abríl 2021 (TATOLI)—Xefe Departamentu Apoiu Ospitalár no Enkamiñamentu Diresaun Nasionál Apoiu Serbisu Hospitalár, Bendita Araújo, hateten pasiente na’in 14, ohin sei dezloka ba Indonézia  ho aviaun Citilink, hodi hala’o tratamentu saúde, iha Ospitál Siloam, Mochtar Riady Comprehensive Cancer Center (MRCCC) Semanggi, Jakarta.

“Sira na’in 14 ne’e, na’in 10 sei ba iha Ospitál Siloam MRCCC Jakarta ho kazu onkolojia no na’in-rua ba Ospitál Siloam Lippo Village Karawachi Jakarta ho moras tumor kakutak no veteranu na’in-rua ba Ospitál Siloam Kebun Jeruk ho moras ruin. Pasiente hirak ne’e, idaidak akompañadu hosi família na’in-ida,’’ Bendita Araújo, hateten ba jornalista Agência Tatoli, iha kna’ar fatin Caicoli, kuarta ne’e.

Notísia relevante:Durante EE, MS transfere pasiente 11 ba rai-liur

Tuir dadus, pasiente ne’ebé iha hela prosesu atu ba hala’o tratamentu iha rai-liur, iha tinan 2020-2021, hamutuk na’in 51, kompostu hosi 2020 na’in 16, no 2021 hamutuk na’in 35.

Hosi númeru ne’e, balun sei iha prosesu nia laran hanesan taka viza, balun sei trata pasaporte tanba iha pasiente lubuk ida mak refere mai hosi Munisípiu, no iha tempu badak sei kompleta dokumentu atu bele hala’o tratamentu iha rai-liur.

“Pasiente ne’ebé ita haruka ba ne’e, maioria hala’o tratamentu ho tempu naruk, tanba kazu barak liu,’’ nia informa.

Diresaun Nasionál Apoiu Serbisu Ospitalár, enfrenta difikuldade durante surtu COVID-19, mak hanesan aviaun, liuliu ba Singapura.

‘’Indonézia ita bele lori pasiente-sira liu hosi fronteira terreste, maibé ba Singapura ne’e difísil tebes,” nia konta tuir.

Oras ne’e daudaun, diresaun ne’e iha dadus katak, pasiente-sira ne’ebé hala’o hela tratamentu iha rai-liur hamutuk na’in 29, kompostu hosi na’in 16 iha Indonézia no na’in 13 iha Singapura.

“Pasiente  hirak-ne’e ba hala’o tratamentu iha 2020 no balun foin mak haruka ba iha janeiru-fevereiru 2021,” nia subliña.

Kada tinan, Governu liu hosi Ministériu Saúde (MS) aloka orsamentu ba paseinte-sira hamutuk millaun $6.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here