Partidu CNRT liuhosi Vise-Prezidente Partidu CNRT, Virgílio Smith, ne’ebé akompaña hosi Prezidente Konsellu Diretiva Nasionál CNRT, Dionísio da Costa Babo, hala’o konferénsia imprensa husu Governu koopera ho Kay Rala Xanana Gusmão hodi fó solusaun ba mate-isin Armindo Borges nian. Imajen Tatoli/Evaristo Soares Martins.

DILI, 14 abríl 2021 (TATOLI)—Partidu Congresso Nacional de Reconstrução de Timorense (CNRT) husu VIII Governu Konstitusionál koopera ho Kay Rala Xanana Gusmão hodi fó solusaun ba mate-isin Armindo Borges, ne’ebé oras ne’e konserva hela sala izolamentu Vera Cruz.

Notísia Relevante: Desizaun hasai mate-isin Armindo Borges hein KM

“CNRT apela ba Governu atu koopera ho asaun Kay Rala Xanana Gusmão nian hodi hetan solusaun ba problema ida-ne’e (mate-isin Armindo Borges) no hatuur dignidade umanu Timor-oan nian tuir nia kultura,” Vise-Prezidente Partidu CNRT, Virgílio Smith, ne’ebé akompaña hosi Prezidente Konsellu Diretiva Nasionál CNRT, Dionísio da Costa Babo, informa liuhosi konferénsia imprensa, iha Bairro dos Grilhos, Dili, kuarta ne’e.

Partidu CNRT ejize Governu tenke dignifika no respeita ema, ema-nia kultura, uzu kustume, valór relijioza no prátika ka tradisaun moris nian ba Timor-oan sira-ne’ebé mate ba COVID-19.

Partidu CNRT mós responde atake sira no dezmente akuzasaun sira hotu ne’ebé dirije ba Kay Rala Xanana no fó CNRT apoia tomak ba Xanana Gusmão nia asaun iha Sala Izolamentu Vera Crus, Dili.

Virgílio Smith argumenta, CNRT apoia ho razaun Kay Rala Xanana Gusmão mak figura prinsipál no primeiru ne’ebé la’o haleu Timor-Leste hodi halo kampaña no promove medida prevensaun COVID-19 ba populasaun sira, liuliu iha área fronteriza.

Nia dehan, Xanana Gusmão respeita no valoriza funsionáriu, ekipa saúde no ema hotu-hotu ne’ebé halo esforsu tomak hodi luta hasoru COVID-19 tanba Xanana mós respeita protokolu COVID-19 nian dezde inisiu, inklui kumpre regra auto-kuarentena to’o loron 14 bainhira fila hosi rai-li’ur (Indonézia).

Virgílio Smith hateten, figura Xanana Gusmão mak foti inisiativa harii fasilidade kuarentena ho fatin izolamentu ba COVID-19 nian iha Tasi-Tolu, ne’ebé oras ne’e uza hodi halo tratamentu ba pasiente COVID-19.

Partidu CNRT nota momoos katak irregularidade barak mak Governu rasik halo iha prosesu tratamentu pasiente COVID-19, mak obriga Xanana Gusmão foti asaun iha loron 12 abríl 2021 tanba Governu deklara Estadu Emerjénsia maibé la foti medida ho rigor iha parte sanitária nian no mós la sériu proteje sidadaun sira hosi ameasa COVID-19.

Partidu CNRT nota katak, Governu halibur hamutuk pasiente pozitivu COVID-19 nian iha fatin kuarentena ho izolamentu maibé la aplika medida rigoroza hodi proteje pasiente sira-nia saúde, hanesan la prepara aimoruk ne’ebé adekuada, la mantein distansiamentu sosiál maibé iha kuarentena sira-ne’e rame hela de’it hanesan iha merkadu.

Nune’e mós, tuir nia, pasiente barak hela iha kuarentena ho izolamentu liu tiha loron 14 tuir protokolu COVID-19 ne’ebé OMS hasai, maibé Governu la husik sira sai hosi kuarentena ho izolamentu no la halo esplikasaun hodi fó razaun di’ak.

“Maun Boot Xanana triste tanba Governu halo presedimentu fúnebre (hakoi ka enterru) sidadaun ne’ebé mate ho COVID-19 lahó dignu no la tuir kultura Timor nian, no la tuir prosedimentu ne’ebé OMS hasai ona,” nia dehan.

Virgílio Smith hateten, irregularidade sira-ne’e mak obriga Xanana halo asaun iha loron 12 Abríl 2021, hafoin rona tiha halerik hosi matebian Armindo Borges (47) nia feen-kaben ho oan sira iha dadeersan madrugada iha rezidénsia Xanana nian, bainhira matebian hakotu iis tanba moras krónika.

Maibé, nia informa, matebian moras krónika no kleur ne’ebé trata fali nu’udar pasiente COVID-19 no obriga atu tuir prosedimentu ne’ebé Organizasaun Saúde Mundiál (OMS) rasik kurrize no hasai tiha ona.

Entretantu, Prezidente Konsellu Diretiva Nasionál CNRT, Dionísio da Costa Babo, konsidera forma protesta Xanana halo ne’e hodi husu Governu atu koopera no aplika prosedimentu ida tuir estandarte OMS nian.

“Liuliu atu tratamentu ba pasiente COVID-19 sira-ne’ebé mate tiha ona maibé prosesu fúnebre tenke ho dignu, tuir kultura, valór relijioza no tradisaun Timor-oan nian, tanba to’o agora Timor-Leste seidauk iha protokolu kona-ba fúnebre,” Eis Ministru Negósiu Estranjeiru no Kooperasaun ne’e hateten.

Dionísio Babo konsidera asaun Xanana nian umanizmu ne’ebé defende povu ne’ebé laiha lian ka laiha forsa kona-ba tratamentu sira lahó dignu.

Iha parte seluk, Prezidente Konsellu Diretiva Nasionál CNRT, Dionísio da Costa Babo, fó-sai katak matebian Armindo Borges la’ós koordenadór partidu CNRT.

“Atu dehan mós katak matebian ne’e la’ós koordenadór partidu nian,” Dionísio esklarese.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here