Mota Babonu fó ameasa boot ba ponte ida ne’ebé lokaliza iha Suku Vaviquinia, Postu Administrativu Maubara, Munisipiu Liquuça. Imajen Tatoli/Hortencio Sanchez

LIQUIÇA, 14 abríl 2021 (TATOLI) – Mota Babonu fó ameasa boot ba ponte  ida ne’ebé lokaliza iha Suku Vaviquinia, Postu Administrativu Maubara, Munisipiu Liquiça.

Notísia Relevante : Ponte Loes besik atu kotu

Ponte ne’e nu’udar ponte estratéjiku ne’ebé fó asesu ba estrada ligasaun Liquiça ba Maubara liubá Munisípiu Bobonaro.

Xefe Suku Vaviquinia, Alcino Nunes . Imajen Tatoli/Hortencio Sanchez

Xefe Suku Vaviquinia, Alcino Nunes hateten, iha tinan hira liubá, mota ne’e la dun fó ameasa ba estrada, maibé tinan ida-ne’e mak fó ameasa tebes.

“Maun sira bele haree ho matan mota tun bee halai tula sa’e to’o ponte leten, ne’e fó impaktu ba movimentasaun transporte públiku sira,” Alcino Nunes informa ba Agência Tatoli iha Maubara, kuarta ne’e.

Nia dehan, mota refere la’ós fó ameasa de’it ba ponte ne’e, maibé ameasa mós komunidade uma-kain besik 100 ne’ebé hela besik mota ninin.

“Ita nia komunidade sira iha ne’e mós risku tebes. Udan mai maka’as tan ho  korrente mota boot bele tebe bee tama komunidade sira-nia uma,” nia hateten.

Iha fatin hanesan emprezáriu Maubara-oan, Cesar Valente Pilotu ne’ebé hela besik iha mota ne’e dehan, mota ne’e fó risku duni, sé Governu la fó atensaun mak bele estraga ponte no populasaun sira nia hela fatin.

“Mota ne’e fó risku boot duni. Foin lalais mota ne’e tun, ha’u rasik hola inisiativa taka rai hodi satan netik mota ne’e no dada bee hodi fase estrada ne’ebé nakonu ho tahu iha ponte leten,” Cesar Valente Pilotu haktuir.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here