Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 14 abríl 2021 (TATOLI)—Komisaun C ne’ebé trata asuntu Finansa Públika iha Parlamentu Nasionál, sujere ba Governu suspende programa Pakote Rekuperasaun Ekonómika (PRE) nune’e orsamentu hosi programa refere responde dezastre naturál.

Prezidente Komisaun C, Deputada Maria Angélica Rangel, preokupada orsamentu ba dezastre naturál tanba proposta-alterasaun ba OJE 2021 tama uluk hafoin akontese inundasaun iha loron 4 abríl .

Nia haktuir, orsamentu 2021 ne’ebé parlamentu aprova iha PRE (Pakote Rekuperasaun Ekonómika) no Ministériu Obra Públika hetan millaun $21,5 ne’ebé previstu iha livru orsamentál 2.

“Totál PRE (Pakote Rekuperasaun Ekonómika) ne’ebé ami deteta iha-ne’e por volta millaun $123,9 (millaun $124). Tuir ami-nia pontu devista, di’akliu PRE ne’e ita suspende lai, osan ne’e ita tau fali ba dezastre naturál,” Deputada Maria Angélica Rangel, hato’o sujestaun ne’e liuhosi audiénsia públika entre Komisaun C ho Vise-Primeiru Ministru no Ministru Planeamentu no Ordenamentu José Maria dos Reis, no Ministru Obra Públika Salvador Pires, kona-ba proposta-alterasaun ba OJE 2021, iha plenária, kuarta ne’e.

Nia fó ezemplu, iha PRE 2020 liubá, Governu prioritiza Administrasaun Munisipál ho montante rihun $396.8 previstu ba Programa Dezenvolvimentu Integradu Munisipál (PDIM) kona-ba konstrusaun no reabilitasaun ba sede suku, edifísiu públiku no postu administrativu.

Nune’e mós, nia dehan, PRE ba Munisípiu Lautem Governu prevee rihun $430 hodi halo konstrusaun no reabilitasaun jardín munisípiu refere bele suspende.

“Ami kuandu haree programa Pakote Rekuperasaun Ekonómika ne’e, ita bele suspende lai hodi foti osan ne’e responde imediata dezastre naturál. Ami lakohi ko’a maibé ami hakarak opiniaun hosi membru Governu sira bele ka lae, tanba agora ita-boot sira laiha dalan tanba alterasaun orsamentu retifikativu ne’e tama ne’e la inklui dezastre naturál,” nia dehan.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here