Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão.

DILI, 14 abríl 2021 (TATOLI)—Vise-Primeiru Ministru no Ministru Planeamentu no Ordenamentu, José Maria dos Reis, hateten hafoin dezastre naturál akontese iha territóriu nasionál sai sasukat hodi halo avaliasaun ba kualidade infraestrutura.

“Depois kalamidade (dezastre naturál) ne’e akontese, tuir ha’u-nia pontu devista buat barak ke ita tenke halo avaliasaun. Ita tenke halo avaliasaun ne’e la’ós de’it ba kualidade infraestrutura ne’ebé mak akontese, kestaun ba organizasaun administrativa no kestaun institusionál,” José Maria dos Reis, koa’lia kestaun ne’e bainhira hala’o audiénsia ho Komisaun C (Finansa Públika) kona-ba proposta-alterasaun ba OJE 2021, iha uma fukun, kuarta ne’e.

Vise-Primeiru Ministru ne’e subliña, avaliasaun ne’e la’ós atu fó-sala ba malu maibé tenke reforsa atu hadi’a di’ak liután kualidade infraestrutura iha territóriu nasionál.

“Ha’u la’ós dehan erru ne’e iha-ne’ebá, Governu no ita hotu tenke asume responsabilidade ida-ne’e. Ita tenta oinsá mak atubele hadi’a di’akliu ba oin,” nia dehan.

Ministru Planeamentu Ordenamentu Territóriu ne’e fó ezemplu, meterolojia Timor-Leste nian seidauk di’ak, tanba Timor-Leste rona fali informasaun hosi meteorolojia hosi tasi sorin.

“Ha’u hanoin ho tempu ida-ne’e ita hotu-hotu halo reflesaun ida, nune’e ita bele haree oinsá mak ita bele la’o ba-oin sai di’ak liután. Ita la fó sala ba malu iha situasaun ida-ne’e,” nia hateten.

Maibé, Vise-Primeiru Ministru sente trsite tanba durante tinan 20 nia laran ne’e laiha planu ordenamentu, planu ordenamentu munisipál, no laiha planu urbanu ba rai ida-ne’e.

“Agora inundasaun akontese ita hasoru problema. Nune’e mós ita tenke halo revizaun ba organizasaun administrativa Dili, sera que ita tenke kontinua suku ka ita tenke halo bairru,” nia esplika.

Tuir nia, suku sira iha Dili luan demais entaun halo xefe suku no aldeia sira lebele kontrola didi’ak sira-nia populasaun.

Entretantu Fundu Infraestrutura (FI) ne’ebé Parlamentu Nasionál aprova liuhosi Orsamentu Jerál Estadu (OJE) 2021 ho montante millaun $339.605 ne’e ba fundu infraesturura.

Montante orsamentu millaun $339.605 ne’e kompostu hosi rihun $32 ba saláriu no vensimentu, millaun $1.040 ba bens (sasán) no servisu no millaun $338.533 ba kapitál dezenvolvimentu.

Iha Fundu Infraestrutura ne’e mós prevee rihun $60 ba boa governasaun no jestaun institusionál, setór agrikulturamillaun $3.798, água no saneamentu millaun $3.449, dezenvolvimentu urbanu no rurál millaun $6.190, edifísiu públiku millaun $7.693, edifísiu edukasaun millaun $4.843, enérjia elétrika millaun $18.321, fibra ótika millaun $41.588, saúde millaun $4.844, seguransa no defeza millaun $13.884.

Nune’e mós solidariedade sosiál millaun $1.000, projetu tasi mane millaun $8.500, aeroportu millaun $19.843, preparasaun dezeñu no supervizaun ba projetu foun millaun $9.441, estrada millaun $105.215, ponte millaun $4.896, portu millaun $1.814, programa ba setór turizmu rihun $ 652.

Programa empréstimu millaun $70.700, programa setór finansa millaun $2.905, Purtantu Sekretariadu Estadu Juventude no Desportu millaun $2.034, Komisaun Administrasaun Fundu Infraestrutura (KAFI) millaun $1.011, programa manutensaun no reabilitasaun millaun $6.924.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here