Xanana hatudu karta ne'ebé nia simu hosi ONU, kuarta (14/04). Imajen Tatoli/Egas Cristovão.

DILI, 14 abríl 2021 (TATOLI)-Karta ne’ebé reprezentativu Nasoins Unidus (ONU) nian haruka ba lider karizmátiku, Kay Rala Xanana Gusmão, kuarta ne’e, esplika kona-ba regra no protokolu Organizasaun Mundiál Saúde (OMS) ba  situasaun pandemia COVID-19.

Karta ne’e, klarifika mós katak mate-isin pasiente COVID-19 bele hakoi tuir tradisaun ka kultura, maibé tenke kumpre nafatin ba regra protokolu saúde nian.

Notísia Relevante : ONU hato’o karta ba Xanana iha Vera Krús

Hafoin lee tiha karta hosi UN Rezidente Koordenadór iha Timor-Leste Roy Trivedy nian, eis Prezidente Repúblika ho naran kompletu José Alexandre Xanana Gusmão ne’e haktuir ba jornalista sira iha sentru izolamentu Vera Krús katak, karta OMS nian ne’ebé nia simu kona-ba prosedimentu hotu-hotu ba atendimentu pasiente COVID-19 no atu hakoi pasiente mate tanba COVID-19.

Xanana hateten, tuir prosedimentu OMS nian ne’ebé mensiona iha karta-ne’e buat hotu kona-ba COVID-19 temi konsiderasaun importante ne’ebé tenke atende ba ema ne’ebé hetan COVID-19 no ema ne’ebé mate ho COVID-19.

Nia dehan, iha regra ne’e hanoin komún ida, ema ne’ebé mate tanba COVID-19 tenke sunu hotu, konforme tuir kultura hanesan relijiaun Hindu.

“Konforme kultura ema ida la bele obriga, ne’e duni se mak mate ho COVID-19 bele  halo tuir buat sira ne’e hotu, maibé ho regra didi’ak nune’e hodi labele iha transmisaun,” Xanana Gusmão hateten.

Notísia Relevante : Desizaun hasai mate-isin Armindo Borges hein KM

Nia esplika, medida ba seguransa ba ema no família hotu-hotu tenke kumpre no ba dignidade ba ema ne’ebé mate tuir kultura ka tradisaun ho sira-nia família sira tenke respeita. Tanba ne’e, Xanana hateten, regra OMS nian antes ne’e nia parte asesu ona hosi OMS, tanba ne’e dala-ida tan  nia parte  agradese karta ne’e  reprezentante ONU haruka tan karta kona-ba prosedimentu regra OMS.

“Ha’u esplika ba reprezentante lori karta OMS, katak la’ós problema boot no ha’u la manan buat ida atu hatún ba buat ruma, lae. Problema ko’alia kona-ba boa-prátika, tanba COVID-19 ema hotu preokupa,” Xanana Gusmão afirma tan.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here