Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 14 abríl 2021 (TATOLI)—Governu liuhosi reuniaun Konsellu Ministru (KM) iha kuarta ne’e, simplifika ona tramitasaun espesiál ajusta diretu ba kompra ho karatér emerjénsia.

Desizaun ne’ebé hetan aprovasaun hosi ezekutivu sira ne’e, bazeia ba alterasaun Projetu Dekretu-Lei kona-ba alterasaun dahituk Dekretu-Lei númeru 10/2005, loron 21 novembru, ne’ebé aprova Rejime Jurídiku Aprovizionamentu.

Ministru Prezidénsia Konsellu Ministru, Fidelis Manuel Leite Magalhães, hateten Dekretu-Lei ne’e halo introdusaun regra foun ba tramitasaun prosedimentu ajustu diretu kompra emerjénsia.

“Nune’e akontesimentu ne’ebé la espera no tau risku ba saúde públika no seguransa, eziste nesesidade urjente ida la tuir prosesu normál aprovizionamentu ba obra, bens no servisu sira ne’ebé la’ós fasil halo prátika hodi hahú prosedimentu konkursu ka kualkér métodu aprovizionamentu,” Ministru Fidelis esplika, hafoin ramata reuniaun ezekutivu, iha Palásiu Governu.

Kondisaun seluk, karik iha deklarasaun ofisiál katástrofe ka situasaun emerjénsia ruma ne’ebé iha nesesidade atu halo obra ka fornese bens no servisu sira, lakon propriedade Governu ka ezijénsia seluk obriga asaun urjente ba interese públiku.

Portavós Governu ne’e dehan, kondisaun sira permite órgaun kompetente bele asina kontratu atubele prátika atus prosedimentu aprovizionamentu no selebra kontratu sein kualkér formalidade.

“Maski kontratu ne’e prodús efeitu imediatu, maibé atus aprovizionamentu no kontratu sira tenke redús eskritu iha prazu másimu loron 60 no kazu sira la presiza autorizasaun, aprovasaun no kabimentu ruma tanba sei asegura to’o momentu redusaun eskritu kontratu,” nia esplika.

Enkuantu, bainhira trata kontratu ezekusaun obra, presu  sei determina hosi aplikasaun valór umanitáriu ne’ebé prevee iha Diploma Ministeriál Konjunta hosi Governu ne’ebé responsabiliza hosi Ministériu Obra Públika no Ministériu Planu no Ordenamentu.

“Diploma refere iha ámbitu deklarasaun Estado de Sítio ka Estadu Emerjénsia, nune’e mós deklarasaun situasaun alerta, kontinjénsia ka kalamidade, bele utiliza prosedimentu aprovizionamentu bazeia ba pedidu kotasaun, ne’ebé independentemente hosi valór adjudikasaun kontratu sira ho kontrapartida despeza kategoria ba bens no servisu sira iha sirkunstánsia espesífika,” Ministru subliña.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here