Bispu Dioseze Maliana, Don Norberto do Amaral. Imajen/Tatoli.

DILI, 13 abril 2021 (TATOLI)—Bispo Dioseze Maliana, Don Norberto Amaral, deside iha fulan-abril nia laran ne’e Diozeze Maliana sei laiha misa tanba haree ba situasaun abitante sira hahú halo viajen legál no ilegál hosi Dili ba Munisípiu Bobonaro.

“Tanba sira hosi Dili tama ona iha ita-nia leet, ha’u hola dezisaun atu iha fulan abril ida-ne’e, ita labele misa lai. Exeptu iha komunidade relijiozu no rejioza sira, maibé ba de’it membru komunidade nian, labele tama tán ema seluk,” Don Norberto Amaral hateten liuhosi karta aviza ne’ebé Agência TATOLI asesu, tersa ne’e.

Don Norberto husu ba padre, madre, no sarani sira iha Dioseze Maliana tenke tau atensaun ba abitante sira-ne’ebé halo viajen hosi Dili mai Munisípiu Bobonaro, tanba sira hirak ne’e mai hosi fatin ne’ebé afetadu ba COVID-19.

Bispu ne’e hatutan, haree ba kazu pozitivu COVID-19 ne’ebé sa’e aas iha Munisípiu Dili, hosi Governu implementa ona serka sanitaria no agora aumenta tán ho inundasaun ne’ebé akontese, halo família barak mak lakon sasán, uma no liuliu lori konsekuénsia ne’ebé makaas ba ema sira-ne’ebé iha Dili, espesialmente sira-ne’ebé la’o rai, no hanesan estudante sira-ne’ebé dependente ba família sira iha foho.

“Situasaun ida-ne’e obriga joven no ema balun buka dalan ses-aan hosi Dili mai foho. Ita la bandu sira atu mai, maibé husu de’it atensaun ba família sira hotu katak família sira-ne’ebé sai hosi Dili halo viajen to’o mai Maliana seidauk halo teste swab karik, ita labele hela kahur malu lai. Maibé ita tenke kumpre protokolu COVID-19 nian, tenke haketak malu ka sosiál distánsial lai, no lori sira ba ospitál halo teste swab,” Don Norberto Amaral apela ba sarani sira.

Tanba ne’e, Don Norberto husu ba sarani Dioseze Maliana tomak atu kumpre nafatin protokolu Organizasaun Mundiál Saúde (OMS) no Ministériu Saúde (MS) fó sai mak hanesan fase liman beibeik, sai ba liur tau máskara, labele kaer liman, labele rei liman, no hamriik dodook malu ka distansiamentu sosiál.

Don Norberto husu ba amu pároku, komunidade relijiozu no relijioza iha Timor laran tomak katak hotu-hotu reza, nune’e ho finalidade satan netik COVID-19 ne’ebé daudaun iha Timor-Leste hamate ona ema nia moris.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here