Mota tama no sobu uma kauza hosi udan-boot ne'ebé akontese iha 03-04 abríl 2021. Imajen espesiál.

DILI, 14 abril 2021 (TATOLI)—Governu liuhosi Ministériu Administrasaun Estatál fó ona orientasaun ba Prezidente Autoridade Munisípiu no Administradór Munisípiu sira atu halo levantamentu dadus ba vítima dezastre naturál iha kada munisípiu ba Governu sentrál atu halo intervensaun.

Administradór Munisípiu Aileu, Abel da Conceição informa, dadus provizóriu vítima dezastre naturál iha Munisípiu Aileu hamutuk uma kain 131 ne’ebé mak afetadu ba inundasaun ne’ebé akontese iha domingu (04/04/2021) foin lalais ne’e.

“Dadus provizóriu ne’ebé tama mai iha Administrasaun Munisípiu Aileu ne’e hamutuk uma kain 131. Hosi númeru uma kain 131 ne’e, ida-ne’ebé hetan estraga totál no hetan estragu kmaan no uma kain 96 ne’e hetan ameasa de’it hosi inundasaun,” Abel da Conceição hateten ba Agência TATOLI liuhosi telefónika, kuarte ne’e.

Vítima sira-ne’ebé sira-nia uma hetan estragu totál ne’e, daudaun ne’e hela provizoriu ho família no viziñu sira, no vítima sira-ne’ebé uma hetan estragu kmaan ne’e sira hadi’a sira-nia uma kontinua hela nafatin hela iha sira-nia uma.

To’o oras ne’e, nia dehan, vítima dezastre naturál sira-ne’e hetan ona apoiu emerjénsia hosi Governu liuhosi Ministériu Solidariedade Sosiál no Inkluzaun (MSSI).

“Vítima sira-ne’e, Governu haruka apoiu nesesidade báziku hanesan foos, Mie Sedaap, ikan lata no sasán dapur nian. Entaun, ita fó apoiu hotu ona ba sira iha sábadu (10/04) foin lalais ne’e,” nia dehan.

Prosesu levamtamentu dadus ba vítima dezastre naturál sira ne’e bazea ba formatu dezastre naturál nian ne’ebé Ministériu Administrasaun Estatál (MAE) hodi fahe ba administradór sira.

Formatu hirak ne’e, nia parte simu tiha ona iha segunda (12/04) no horisehik fahe ona ba Administradór Munisípiu no Administradór Postu Administrativu sira iha Aileu atu fó ba lideransa komunitáriu sira, hodi rekolla dadus vítima dezastre naturál nian.

“Ami foin simu formatu ne’e iha horibainrua, horisehik mak ha’u foin manda ba Postu Administradór sira atu fahe ba Xefe Suku no Xefe Aldeia sira atu foti vítima sira-nia dadus. Entaun, daudaun ne’e ita seidauk iha dadus loloos ba vítima dezastre naturál sira no infraestrutura hira mak hetan estragu,” nia dehan.

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here