Prosesu haloot mate-isin ne’ebé mate dahuluk ho COVID-19 iha Metinaro, tersa (06/04). Imajen Tatoli/Joanico de Araújo.

DILI, 14 abríl 2021 (TATOLI)—Tuir avaliasaun interna hosi Sala Situasaun Sentru Integradu Jestaun Krize (SIJK), rekoñese katak, prosesu funerál ba kazu mate dahuluk ho COVID-19 iha Metinaro, ladún di’ak tanba falla desizaun iha terrenu.

“Los duni, iha funerál dahuluk ne’e ladún di’ak tanba iha momentu ne’ebá uza eskavadór mak hiit kaixaun ba rai ku’ak. Ida ne’e, autoridade saúde mós rekoñese katak la dignu. Kolega ne’ebé serbisu iha área ne’e rasik rekonese katak, momentu ne’ebá ema hotu atrapalladu tanba foin mak kazu dahuluk,’’ Koordenadór Forsa Tarefa ba Prevensaun no Mitigasaun, Rui Maria de Araújo, hateten iha Centro Convenções Dili, kuarta ne’e.

Notísia relevante:Mate-isin pasiente COVID-19 haloot ona, liu loron-10 família bele vizita

Rui Maria de Araújo esplika, antes ne’e ekipa ne’ebé atu haloot, tuir ona formasaun no halo ona simulasaun  ne’ebé preparadu, maibé  enfrenta kazu reál ida dahuluk ne’e, hotu-hotu atrapalladu, entaun iha terenu ne’e desizaun oin seluk.

“Entaun, Governu rekoñese ida-ne’e,  no intensaun ne’e iha kazu da-ruak  atu aplika ona mudansa lubuk ida, inklui respeitu ba kultura no respeitu ba buat seluk, hanesan tau tais no tau ai-funan, tenki taka rai ku’ak halo didi’ak,’’médiku ne’e subliña.

Doutór Rui mós klarifika katak, tuir pontu de vista saúde-nian, bainhira ema mate iha grupu rua kompostu hosi ema mate tanba COVID-19 no mate ho COVID-19.

Mate tanba COVID-19 ne’e signifika, ema ne’e hakotu iis tanba prosesu moras, COVID-19 mak provoka to’o mate, maibé mate ho COVID-19 posivelmente nia bele iha moras seluk ne’ebé mak provoka.

“Kazu mortalidade rua ne’ebé rejistu iha Timor-Leste, ne’e kategoria mate ho COVID-19 la’ós mate tanba COVID-19,” nia esklarese.

Entretantu, Francisca Gama (44) nu’udár timor-oan dahuluk ne’ebé hakotu iis iha tersa (06/04) dadeer iha sala izolamentu Ospitál Lahane ho COVID-19, hakoi iha semitériu ne’ebé lokaliza iha postu administrativu Metinaro, munisípiu Dili.

Notísia relevante:Mate-isin Armindo Borges haloot ona iha simetériu Manleuana

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here