Kondisaun abitante Aitarak-laran nia uma hafoin inundasaun, segunda (05/04). Imajen TATOLI/António Gonçalves

DILI, 14 abríl 2021 (TATOLI)–Embaixadór Austrália iha Timor-Leste, Peter Robert, afirma, Governu Austrália komprometidu apoia Timor-Leste kombate surtu COVID-19 no dezastre naturál ne’ebé foin lalais akontese hodi estraga populasaun nia hela fatin no infraestrutura públika.

“Ha’u hasoru malu ho Primeiru-Ministru atu ko’alia kona-ba asuntu rua ne’e. Iha tempu difísil kolega no viziñu tenke hamriik hamutuk rezolve impaktu inundasaun, tanba ne’e Austrália prontu nafatin fó apoiu ba Timor-Leste. Ami anunsia ona pakote foun ho montante AU$7 (millaun $5-resin) atu serbisu hamutuk ho Timor-Leste,” Embaixadór australianu ne’e relata hafoin hasoru PM Taur, iha Palásiu Governu, kuarta ne’e.

Notísia relevante: Austrália iha kompromisu apoia millaun AU$7 ba Timor-Leste

Aleinde ne’e, diplomata ne’e dehan, Austrália kontinua serbisu hamutuk ho Governu iha área oin-oin liuhosi sistema governasaun.

“Apoiu ne’e inklui mós ai-han, nesesidade bázika ba populasaun sira iha sentru evakuasaun, atu apoia sira fila ba uma ne’ebé providensia sasán seluk ne’ebé presiza, pakote ne’e mós inklui osan ba Organizasaun Naun Governamentál (ONG) sira ne’ebé serbisu iha sentru evakuasaun,” nia akresenta.

Austrália mós bele lori ekipa saúde mai Timór atubele serbisu hamutuk ho Governu hodi responde ba dezastre naturál no COVID-19.

“Asuntu importante seluk mak ha’u ko’alia ho Primeiru-Ministru kona-ba COVID-19 no vasina. Ha’u kompromete katak Austrália prontu fornese vasina hosi Austrália nia armazen rasik atu apoia prosesu vasinasaun iha Timor-Leste no agora ha’u-nia ekipa ko’alia ho Ministériu Saúde (MS) no ekipa tékniku kona-ba atividade ne’e. Ha’u kontente tebes serbisu hamutuk ho Timor-Leste iha área importante rua ne’e,” diplomata ne’esubliña.

Kona-ba vasina, Embaixadór ne’e dehan, Austrália prontu oferese vasinasaun ba populasaun Timor-Leste to’o 80%.

Tinan kotuk oferese orsamentu hamutuk millaun $25 no tinan ne’e kontinua nafatin, prinsipál iha vasinasaun Austrália sei kontinua apoiu nafatin maibé depende ba prosesu.

“Ami iha kompromisu atu serbisu hamutuk fornese vasinasaun ba ema hotu. Primeiru-Ministru kontente tanba tempu difisíl hanesan ne’e hanesan viziñu tenke hamriik hamutuk,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here