Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen TATOLI/Egas Cristovão

DILI, 14 abríl 2021 (TATOLI)–Konsellu Ministru (KM) aprova alterasaunm dahuluk Dekretu Governu númeru 12/2021, loron 01 abríl, kona-ba medida ezekusaun deklarasaun Estadu Emerjénsia (EE), hosi Dekretu Prezidente Repúblika númeru 17/2021, loron 31 marsu, kona-ba regra kuarentena ba pesoál ajuda umanitária.

Portavós Governu no Ministru Prezidénsia Konsellu Ministru, Fidelis Manuel Leite Magalhães, hateten, alterasaun ne’e ninia objetivu atu fasilita tékniku umanitáriu sira ne’ebé mai hosi rai-li’ur atu apoia Timór.

“Sira tenke iha sertifikasaun teste COVID-19 ho rezultadu negativu antes sa’e aviaun no bainhira to’o iha Dili, halo tan teste hodi komfirma katak negativu duni la presiza kumpre kuarentena loron 14 no bele hahú kedan serbisu,” Ministru Fidelis relata hafoin ramata reuniaun ezekutivu iha Palásiu Governu, kuarta ne’e.

Notísia relevante: Medida ezekusaun EE da-XII: suspeita infesaun COVID-19 obrigatóriu teste swab

Nune’e mós, alterasaun ne’e loke dalan ba funsionáriu sira hosi ministériu relevante hanesan  Ministériu Interiór (MI), Sekretaria Estadu Protesaun Sivíl (SEPS), Ministériu Solidariedade Sosiál no Inkluzaun (MSSI), Ministériu Obra Públika (MOP), Ministériu Planu no Ordenamentu (MPO), no entidade relevante atubele desloka ba munisípiu hodi bele ajuda vítima dezastre naturál inklui halo intervensaun ba estragu hosi inundasaun ne’ebé akontese iha domingu (04/04).

“Loke dalan mós ba hirak ne’ebé atu bá munisípiu hosi Organizasaun Naun Govermentál (ONG) sira, atu fó apoiu komunidade iha munisípiu sira, maibé sira mós presiza hatudu prova katak sira negativu nune’e bele bá,” nia  subliña.

Enkuantu, ba fatin ne’ebé atu halo teste swab, aleinde iha Laboratóriu Nasionál, Sala Situasaun-Sentru Integradu Jestaun Krize (GICG, sigla portugés) prepara mós fatin ida hodi fasilita hirak ne’ebé atu bá munisípiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here