Lider Karizmátiku, Kay Rala Xanana Gusmão, hein hela iha Sentru Izolamentu Vera Krús, Dili. Imajen TATOLI/Egas Cristóvão.

DILI, 13 abríl 2021 (TATOLI) —  Matebian Armindo Borges halo Eis-Prezidente Repúblika Kay Rala Xanana Gusmão, tenke toba kalan tomak iha fatin izolamentu Vera Cruz nia oin to’o rai naroman hodi hein desizaun Governu nian.

Tanba Xanana hakarak Ministériu Saúde rekoñese sala kona-ba ema ne’ebé mate prega ba COVID-19 no tenke entrega mate-isin Armindo Borges ba família.

Ho ezijénsia ne’e, Governu liuhosi Ministériu Saúde seidauk responde entaun Xanana Gusmão deside toba kalan tomak iha fatin izolamentu Vera Cruz.

Xanana Gusmão, iha loron segunda (12/4) halo asaun protesta hasoru Ministériu Saúde durante loron tomak iha arredór izolamentu Vera Cruz.

Autoridade sira barak hakbesik ba Xanana atu husik fatin ne’e maibé la konvense hotu, únika Komodori Pedro Klamar Fuik konsege konvense horikalan maibé seidauk iha rezultadu hodi entrega mate-isin ba família.

Hosi asaun protesta durante loron tomak ne’e, Eis-Primeiru Ministru ne’e toba iha tuku 11:17 horikalan, iha loron segunda ne’e no hadeer iha tuku 03:31.

Ema lubun boot ne’ebé akompaña líder karismátiku ne’e sente triste ho líder nasionál ne’ebé toba de’it iha estrada no karreta ida mak helik hela.

Purtantu hosi parte família matebian mós akompaña Kay Rala Xanana Gusmão toba hein iha fatin izolamentu Vera Cruz.

“Avó toba de’it iha-ne’e ka, kuitadu, maibé avó fila sá, ami família laiha ona forsa,” família matebian ne’ebé hein hela mate-isin informa ba líder istóriku ne’e, iha segunda kalan.

Tuir observasaun Agência TATOLI, komesa horikalan to’o ohin, akipa membru PNTL no Korpu Seguransa Pesoál (CSP-sigla portugés) fó seguransa másimu ba Xanana Gusmão, família matebian no ema sira-ne’ebé akompaña situasaun ne’e iha fatin izolamentu.

Notísia relevante:Xanana hahú toba ona iha sentru izolamentu oin

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here