Tenente Major Jeneral Lere Anan Timur hasoru malu ho Xanana Gusmao iha Fatin Isolamentu Vera Cruz, 13 Abril 2021.Imajen Tatoli/Antonio Goncalves

DILI, 13 abríl 2021 (TATOLI)—Líder Karismátiku Kay Rala Xanana Gusmão, ohin, iha negosiasaun ne’e informa ba Xefe Estadu Maiór Jenerál F-FDTL, Tenente Jenerál Lere Anan Timur, katak asaun ne’ebé la’o iha sentru izolamentu nu’udar asaun sívika no la kontra Governu maibé ezije Ministériu Saúde hadi’a-aan iha prevensaun surtu COVID-19 iha Timor-Leste.

Notísia Relevante: Negosiasaun Lere ho Xanana seidauk iha rezultadu

“Ami la kontra Governu, ne’e asaun sívika ida atu dehan Ministériu Saúde, hadi’a oituan sira-nia hahalok ne’e hodi sai di’akliu,” Xanana Gusmão hateten ba Lere Anan Timur iha negosiasaun entre Xanana Gusmão ho Lere Anan Timur ne’ebé akontese iha Sala Izolamentu Vera Cruz, Dili.

Xanana Gusmão esplika, povu atu fiar tenke halo sasán ho loloos, nune’e ema hotu bele partisipa iha prevensaun COVID-19.

“Ha’u la’ós la preokupa ho COVID-19 tanba iha tinan kotuk kedas ha’u la’o uitoan, ha’u mós hakarak ajuda Estadu hosi kotuk hodi esklarese ba malu. Ha’u la impede Governu. Ha’u hakarak apoiu iha COVID-19 maibé halo sasán ne’e ho didi’ak bá,” Eis Prezidente Repúblika ne’e hateten ba Lere Anan Timur iha sira-nia konversa.

Xanana haktuir ba Lere, matebain nia oan feto tanis iha dadeersan tuku 05.00, horisehik (12/04/2021), hodi informa kona-ba motivu moras hosi matebian Armindo Borges nian.

“Ha’u-nia aman la’ós moras COVID-19, moras kleur ona. Moras COVID-19 karik, ami (oan) mak lori bá laran. Nia moras COVID-19 ba simu COVID-19 hosi ne’ebé. Aami di’ak hotu. Nusá mak ami-nia aman derrepende kona COVID-19 ne’e,” Xanana Gusmão haktuir.

Nune’e, Jenerál Lere Anan Timur informa ba Xanana katak, dezde uluk kedas defende Xanana Gusmão to’o Timor-Leste hetan independénsia, tanba ne’e tenke hamutuk lori nasaun ne’e bá oin.

“Ami servisu hodi fó vida tomak ba maun. Fó soldadu mak mate uluk, Xanana mate ikus. Xanana mate uluk, ita mate mohu. Ohin loron, sé mak ukun Timor ne’e. La seluk no la leet, ita mai hosi ai-laran mak ukun Timor ne’e. Se maun lafiar, hasai tiha sira,” Lere Anan Timur hateten.

Maibé, Xanana Gusmão hatán ba Lere Anan Timur hodi hateten Doutór Francisco Guterres Lú Olo mak kaer nasaun, Doutór Aniceto Longuinhos Guterres Lopes iha Parlamentu Nasionál, no Jenerál Taur Matan Ruak iha Governu.

“Nasaun sira mak kaer, ha’u la kaer buat ida. Ha’u sei la husik fatin ne’e, só mate-isin ne’e ha’u ba hakoi tiha iha nia fatin mak bele hotu,” Xanana dehan.

Maibé, nu’udar luta-náin maluk, Lere Anan Timur hataán ba Xanana Gusmão. “Sé maun dehan Lú Olo, Taur la vale ona, entaun haruka hasai tiha,” Lere Anan Timur hateten ba Xanana.

Maske nune’e, Xanana Gusmão mantein nafatin iha ninia desizaun no respeita nafatin ukun-na’in sira.

“Ha’u labele haruka, tanba ne’e demokrasia. Estadu direitu demokrátiku, ita respeita sira. Ha’u nunk ko’alia aat sira, ha’u respeita nafatin,” Xanana fó resposta ba Lere Anan Timur.

Notísia Relevante: Lere husu Polísia haruka fila manifestante sira

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here