Responsável sentru evakuasaun Komunidade Filhas de Maria Auxiliadora Comoro, Dili, Madre Jacinta Gusmão, FMA. Imajen Tatoli/Joanico de Araújo.

DILI, 13 abril 2021 (TATOLI)—Responsável sentru evakuasaun Komunidade Filhas de Maria Auxiliadora (FMA) Comoro, Madre Jacinta Gusmão, informa vítima dezastre naturál ne’ebé sofre ba inundasaun liuliu inan isin-rua no labarik sira-ne’ebé evakua no hela iha sentru evakuasaun ne’e hamutuk uma-kain 43.

Notísia Relevante: Labarik 250 hela iha sentru evakuasaun Don Bosco Comoro

 “Ami nuudár organizasaun relijioza apoiu ne’ebé fó ba maluk vítima inundasaun sira, ho objetivu parte relijioza ita-nia odamatan nakloke nafatin ba maluk sira-ne’ebé presiza tulun. Entaun, uma-kain ne’ebé ami simu hela iha ami-nia fatin hamutuk 43. Maibé, família uma-kain lima fila on aba sira-nia uma. Daudaun ne’e hela uma-kain 29,” Madre Jacinta Gusmão, informa ba Agência TATOLI, tersa ne’e.

Vítima dezastre naturál ne’ebé hela iha sentru evakuasaun ne’e, nia dehan, haree liu ba inan isin-rua, ferik no katuas, labarik kiik sira hosi idade 0-5, no ema ho defisiénsia hamutuk na’in-rua (2).

“Iha domingu (04/04), bainhra vítima sira evakua mai iha salaun Sentru Formasaun Don Bosco Comoro, ami haree labarik kiik no inan isin-rua sira mós barak, entaun koordena ho Irmão Adriano iha momentu ne’e kedas, ami lori mai iha ami-nia fatin tanba inan isin-rua no labarik kiik-oan sira mak vunerável liu,” nia hateten.

Tanba ne’e, hahú hosi loron ne’e kedas to’o ohin loron, sira-nia parte koordena kedas ho pesoál saúde sira hosi Organzasaun Saúde Ba Ema Hotu (SABRH) halo kedas tratamentu saúde ba inan isin-rua, labarik sira no refujiadu sira seluk mós.

“Iha ne’e, hosi parte saúde nian ne’ebé bolu Grupu Saúde Ba Ema Hotu, sira mai kontrola no konsulta ba vítima sira-ne’ebé hela iha ne’e. Doutóra espesialista hosi UN nian, mai haree liu ba inan isin-rua, inan fó susu labarik, tanba ami iha ne’e inan isin-rua na’in-neen (6),” madre ne’e hateten.

Hosi konsulta ne’e, nia dehan, liuhosi diagnostika mak pesoál saúde sira deteta labarik kiik sira barak sofre moras hanesan inus metin, isin-manas no kanek kiik sira ne’e maibé agora sira-nia kondisaun rekopera ona.

Atu labarik sira labele sente trauma, nia hatutan, madre sira iha Komunidade Filhas de Maria Auxiliadora Comoro ne’e halo animasaun ba labarik sira liuhosi aprende hakerek, kanta no halimar jogu ba labarik kiik-oan sira.

Imajen/Facebook: FMA.

“Atendimentu ba labrik kiik oan sira, dadeersan sira matabixu, meudia han no lorokraik organizasaun sira hosi Xanana Gusmão Reading Room, antigu alunu FMA Comoro no seluk tan, sempre mai anima labarik sira iha fatin ne’e hodi hanorin labarik sira hakerek, kanta, halimar no seluk tan,” nia haklaken.

Iha sentru evakuasaun ne’e, nai hateten, sira simu vítima dezastre naturál ho ema natón de’it tanba haree mós ba kapasidade sala-de-aula eskola nian ne’ebé limitadu tebes.

“Iha ne’e, ami labele simu barak tanba tuir kapasidade sala eskola nian. Tanba sala FMA Comoro hamutuk 11 de’it, entaun daudaun ne’e vítima hela hotu ona, ne’ebé ami simu depende tuir kapasidade sala-de-aula nian,” Madre Jacinta Gusmão hateten.

Duranta akontese udan ho intensidade boot iha domingu (04/04) to’o agora, nia informa, sira-nia parte hetan apoiu hosi Governu liuhosi Ministériu Solidaridade Sosiál no Inkluzasaun (MSSI), Protesaun Sivíl, no pesoál balun ne’ebé laran luak hodi fó apoiu ba vítima sira-ne’ebé refujia iha fatin ne’e.

“Ita iha ne’e simu apoiu barak hosi privadu, antigu alunu FMA Comoro, Governu, Plan internasionál, no hosi igreja Austrália,” nia informa.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here