Kondisaun Mota Comoro, durante inundasaun iha Dili, segunda (12/04/2021). Imajen TATOLI/António Gonçalves

DILI, 13 abril 2021 (TATOLI)—Administradór Postu Administrativu Vera Cruz, Munisípiu Dili, Otávio Vieira do Amarál, informa dadus finál ne’ebé autoridade lokál sira iha Postu Administrativu Vera Cruz rekolla, iha uma-kain 3.221 mak afetadu ba dezastre naturál ne’ebé akontese iha domingu (04/04/2021) foin lalais ne’e.

“Prosesu levantamentu dadus kona-ba vítima inundasaun nian ita iha Aldeia 48, suku hitu. Hosi Postu Administrativu Vera Cruz, ita rekolla dadus ne’ebé tama 95% no hela 5% mak seidauk, tanba dadus hosi Suku Lahane Osidentál mak seidauk tama. Entaun, vítima afetadu ba ba inundasaun ne’e total provizóriu hamutuk uma-kain 3.221. Aban, ami enkamina ona ba Munisípiu Dili,” Otávio Vieira do Amarál hateten ba Agência TATOLI liuhosi telefónika, tersa ne’e.

Nia hatutan, virifikasaun dadus ne’ebé sira rekolla ne’e bazea ba formuláriu hosi Ministériu Administrasaun Estatál (MAE) ne’ebé distribui ba sira, entaun hosi verifikasaun ne’e iha formatu rua mak tenke prenxe mak formatu I prenxe kona-ba oinsá vítima sira-nia uma ne’ebé bee tama maibé estraga kmaan.

Ba formatu II, nia dehan, haree liu ba oinsá sasán sira-ne’ebé estraga totál hosi inundasaun hanesan mota sobu uma to’o estraga totál no mota lori uma to’o mohu.

“Iha Suku Caicoli, formatu I iha uma-kain 1319, formatu II uma-kain ida (1) mak hetan estagu totál, entaun hamutuk 1.320. Suku Colmera Formatu I iha uma kain 192, formatu II uma-kain ida (1) ho totál hamutuk 193. Suku Dare, formatu I iha uma kain 100, formatu II iha uma kain 98 ho totál hamutuk 198. Lahane Osidentál dadus seidauk tama. Marcarinhas, formatu I iha uma-kain 227, Formatu II uma kain 253 ho totál hamutuk 481. Motael formatu I iha uma kain 928, formatu II zero ho totál hamutuk 928. Vila-Verde, formatu I iha uma kain 97, formatu II uma kain haat (4) ho totál hamutuk 101. Eentaun, totál uma kain hamutuk 3.221,” nia esplika.

Nia infroma, vítima afetadu ba inundasaun sira ne’e, durante ne’e sai refujiadu iha konventu Filhas de Maria (FM)-Salesiana Don Bosco, Balide, Dili, no sentru evakuasaun seluk tán.

“Sira hetan hotu apoiu emerjénsia hosi Governu, kompañia, no daudaun ne’e balun sei refujia hela iha sentru evakuasaun sira no balun fila-fali ona ba sira-nia uma,” nia hateten.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here