Logotipu Programa “Eskola Ba Uma”. Imajen/Espesiál.

DILI, 13 abríl 2021 (TATOLI)—Timor Leste Coalition for Education (TLCE) konsidera programa ‘eskola ba uma’ la efetivu tanba la garante progresu estudane-sira iha nível Ensino Secundario to’o Ensino Basico.

Tuir akompañamentu no avaliasaun hosi TLCE katak, programa ne’e ladún ajuda estudante-sira tanba durante ne’e estudante-sira sei depende hela ba aula prezensiál, nune’e difisil atu estuda mesak iha uma.

Notísia relevante:MEJD lansa programa eskola ba uma no tele-eskola

“Dependénsia labarik sira-nian iha aula prezensiál ne’e makaas liu kuaze 70% kompara ho estuda iha uma 30% de’it. Tanba ne’e difísil atu estuda mesak,” Diretór ezekutivu TLCE, José Monteiro, hateten ba jornalista Agência Tatoli, iha ninia serbisu fatin FONGTIL Caicoli, tersa ne’e.

Diretór TLCE ne’e dehan, matéria online ‘eskola ba uma’ hahú ona liuhosi kanál televizaun, maibé iha survei hatudu katak, inan-aman sira mós, la fokus hodi akompaña oan-sira durante minututu 30 nia laran.

Maski TLCE nia observasaun katak, programa ne’e la ajuda labarik-sira, maibé ida-ne’e mak mekanizmu ne’ebé Governu kria hodi apoiu estudante-sira bele apreende mesak iha uma.

“Ami konsidera matéria online ne’e la ajuda labarik-sira. Maibé, dalan mak ida-ne’e ona. Laiha tan maneira seluk mak Governu bele halo iha ámbitu serka sanitária,” nia subliña.

Parte TLCE mós rekomenda katak, dalan úniku ne’ebé atu ajuda labarik-sira maka inan-aman sira, maibé ida-ne’e mós difísil tanba inan-aman barak mós akaba estudu iha tempu Indonézia nune’e la konsege kempriende matéria ne’ebé iha.

Tanba ne’e, iha mós rekomendasaun seluk katak, Ministériu Edukasaun Joventude no Desportu (MEJD), tenki halo atu bele ajuda liutan estudante-sira iha materia online ne’e, involve partisipasaun profesór-sira atu halo mós aprezentasaun iha programa ne’e iha kada matéria, nune’e labarik-sira sente iha duni interasaun.

Bainhira MEJD la konsege adopta rekomendasaun hirak ne’e, maka TLCE husu ba Governu atu buka última solusaun, hapara medida serka sanitária, reforsa de’it mak regra liuliu apoiu bee fase liman iha eskola-sira no edifísiu hotu, depois bele aselera atividade hotu, maibé rigór iha kumprimentu ba protokólu Organizasaun Mundiál Saúde (OMS).

TLCE fó sujestaun ne’e tanba fulan tolu ona tenke halo avaliasaun ba prosesu implementasaun serka sanitária ho ninia implikasaun iha nasaun ne’e, la’ós de’it iha aspetu ekonomia, maibé ba aspetu hotu.

Entretantu, MEJD lansa programa eskola ba uma no tele-eskola ba estudante ensinu báziku terseiru síkulu, Ensino Secundario Geral (ESG) no Tecnico Vocacional (TECVOC), iha 31 marsu tinan ne’e.

Programa ne’e aplika ba Munisípiu Dili, Baucau no Viqueque ne’ebé kontinua iha situasaun serka sanitária.

Antes ne’e Ministru Armindo Maia rekoñese katak, estudante barak iha área rurál sei difísil atu asesu ba programa ne’e, tanba laiha fasilidade hanesan televizaun no telefone android, maibé iha maneira seluk ne’ebé MEJD prepara maka kontinua apoiu livru ba estudante-sira.

MEJD transmite programa ne’e liu hosi kanál Televizaun Edukasaun (TVE) ne’ebe halo Live streaming iha liña  https://fb.watch/4A4UGplwk0/, no mós Buletim Sapientia ne’ebe fo sai kada fulan tolu.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here