Logotipu La'o Hamutuk. Imajen/Espesiál

DILI, 13 abríl 2021 (TATOLI)—Sosiedade Sivíl, La’o Hamutuk (LH) rekomenda ba ezekutivu sira atu dezenvolve planu forte hodi responde nesesidade povu hafoin akontese dezastre naturál ne’ebé fó impaktu maka’as, liu-liu ba estragu infraestrutura públika no privada sira.

Tuir Organizasaun Naun Governamentál (ONG) ne’e, kalamidade inundasaun hatudu frakeza iha infrastrutura, ne’ebé dezafia Governu hamenus impaktu husi dezastre naturál iha futuru.

“Governu no membru Parlamentu Nasionál (PN) presiza dezenvolve planu forte atu uza  rekursu ekonómiku atu responde ba nesesidade umanu no infrastrutura, inklui konsidera impaktu ba setór agrikultura no seguransa ai-han inklui fornesimentu bee moos no apoiu ba ema afetadu,” refere nota ne’ebé Agência TATOLI asesu, tersa ne’e.

La’o Hamutuk hato’o submisaun ba PN kona-ba proposta alterasaun lei Nú 14/2020 ba Orsamentu Jerál Estadu (OJE) ba 2021.

“Ami fiar katak problema ne’ebé foin liu bele sai hanesan referénsia ba Governu atu realiza no redezeña planu espasiál ne’ebé mak bele hatuur no haketak utilizasaun ba rai no espasu adekuadu, ne’ebé integradu inklui konsidera mós ba aspetu ambiente atubele iha mitigasaun ba dezastre naturál liu-liu iha zona protejidu  sira,” subliña nota hosi sosiedade sivíl.

Aleinde ne’e, LH mós hato’o apresiasaun boot ba Deputadu/a sira iha PN inklui Governu ne’ebé prontu atu hala’o debate iha situasaun difísil.

“Ami hakarak apresia Governu nia esforsu no servisu maka’as ba medida preventiva hotu ne’ebé ho objetivu atu hakotu kontaminasaun surtu COVID-19 iha ita-nia rain no responde lalais dezastre naturál ne’ebé Timor-Leste foin hasoru,” LH apresia.

Sosiedade sivíl ne’e mós sujere ba ezekutivu sira atu iha  tempu  badak, importante atu hadi’a filafali estrada, eskola, drainajen, no buat seluk ne’ebé sai hanesan nesesidade urjente ida atu responde lalais ba situasaun ekonómiku ne’ebé grave tebes ba povu ki’ik sira, liu-liu hirak ne’ebé buka moris rasik no la depende ba setór privadu ka setór públiku.

OJE 2021 retifikativu haktuir prinsípiu justisa

LH konsidera, atu responde ba situasaun ida ne’e, Governu no Deputadu sira presiza avalia fali proposta alterasaun ba lei nú 14/2020  OJE 2021.

Liuhosi submisaun, LH hato’o hanoin kona-ba oinsá mak OJE 2021 retifikativu bele haktuir prinsípiu justisa, igualdade no sustentabilidade.

Tuir ONG, kalamidade rua ne’ebé nasaun hasoru presiza atuasaun urjénsia ba infrastrutura inklui hakbiit fali kondisaun ekonómiku hodi asegura povu bele sustenta moris iha tempu susar nia laran.

“Nu’udar medida kurtu prazu ne’ebé urjente, subsídiu estraordináriu sai importante atu apoiu ema ne’ebé sofre ona tanba situasaun ekonómiku ne’ebé susar dezde estabelese situasaun Estadu Emerjénsia no sai piór liután bainhira hasoru dezastre inundasaun ne’ebé ho volume boot no hetan estragu barak,” katak.

La’o Hamutuk mós apoiu Governu nia proposta atu fornese subsídiu estraordináriu ba populasaun, liuhosi proposta alterasaun ba OJE 2021 ne’ebé Governu hato’o ba Parlamentu molok dezastre no inundasaun.

“Ami hanoin katak laiha razaun atu  fahe montante diferente durante tempu emerjénsia, molok Governu  konsege avalia impaktu inundasaun ba kada uma-kain no nesesidade ida-idak inklui hirak ne’ebé sofre kleur ona dezde situasaun Estadu Emerjénsia,” esplika nota ne’e.

OJE 2021 atu finansia reparasaun ba infrastrutura no medida médiu no longu prazu atu apoiu ba ema ne’ebé afetadu, inklui asegura seguransa ai- han.

“Ami apresia katak iha versaun dahuluk hosi alterasaun orsamentu 2021 ne’ebé Governu  hato’o ona ba Parlamentu, Governu propoin atu muda fundu hosi projetu no atividade balun, inklui alokasaun Fundu Infrastrutura ba aeroportu no projetu Tasi Mane, no alokasaun liu hosi Dotasaun ba Governu Tomak ba viajen nasaun seluk atu finansia medida foun,” refere submisaun ne’e.

Jornalista : Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here