sistema siklone. Imajen/DNMG

DILI, 13 abríl 2020 (TATOLI)—Tuir previzaun tempu hosi Diresaun Nasionál Meteorolojia no Jeofízika (DNMG, sigla Portugés) hosi Ministériu Transporte no Komunikasaun (MTK), iha semana ne’e hahú iha loron 13 to’o 18 abríl, kondisaun atmosfera estável.

Diretór Nasionál Metrólojia no Jeofízika, Terencio Fernandes Moniz, hateten bazeia ba observasaun hosi modelu  meteorolójiku ne’ebé diferente, nota katak iha semana ne’e nia laran kondisaun atmosfera sei estável ka maioria naroman.

“Ita observa modelu atmosfera sei akompaña ho kalohan balun, liu-liu iha parte dadeer no lorokraik, atmosfera kontinua estável ka naroman akompaña ho kalohan balun no posibilidade kalohan refere sei dezenvolve-an hodi taka, nune’e sei favorese udan ho intensidade fraku moderada kuaze iha territóriu nasionál preferensialmente entre loron 16 to’o 17 abríl,” Diretór ne’e dehan ba Agência TATOLI, iha ninia knaar fatin, tersa ne’e.

Tuir nia, velosidade anin varia hosi fraku moderadu (3-20 km/h), akompaña ho rajada anin ne’ebé bele sustenta to’o 40 km/h iha Timór laran hotu.

Aleinde ne’e, temperatura ár iha rejiaun kosteira varia hosi 25-30 grau sélciu no iha rejiaun montaña varia hosi 19 to’o 25 grau sélciu.

Nune’e mós, kondisaun laloran nia a’as iha Kosta Súl (tasi mane) varia hosi metru 0,3 to’o 1,0 (normál) no iha Kosta Norte (tasi feto), laloran nia a’as varia hosi metru 0,23-1,0 (normal).

Laiha ALERTA ba kondisaun extremu

Ho baze ba previzaun ne’e, DNMG hakarak informa ba komunidade jerál iha terrítoriu Timór katak laiha ‘ALERTA’ ba kondisaun tempu extremu (cuaca buruk) hanesan iha  loron 04 abríl.

“Karik iha ami sei fó sai ba públiku, maibé antes fó ALERTA,  DNMG sei fó informsaun tuir nível ka klasifikasaun avizu meterorolójiku sira hanesan avizu jerál, atesaun no atesaun espesiál no ikus liu mak alerta,” Diretór ne’e esplika.

DNMG hakarak realsa tan katak Siklone Tropikal Seroja foin daudaun mosu iha Tasi Timór hanesan depresaun tropikál/tropical low, ne’ebé seidauk kategoria ba cyclone tropical.

Sistema ne’e desloka ba Kosta Súl, Nusa Tengara Timur  (NTT) no forma nu’udar Siklone Tropikál iha loron 05 abríl ho valór presaun sentrál entre 989-993 hPa.

Badan Meteorologi, Klimatologi dan Geofisika (BMKG)-Indonézia fó naran ‘Siklone Tropikál Seroja’, nune’e transporta umidade ne’ebé exsesivu hosi oseanu (tasi) ba kontinente (rai) no ajuda formasaun kalohan hodi kauza udan ho intensidade  forte-extremu hodi hamosu inundasaun iha fatin-fatin.

Nia esplika, siklone hanesan sistema baixa presaun iha eskala sinótika ida-ne’ebé responsável hosi transporte calor, umidade no momentum ne’ebé mak transporta husi Equador ba iha Polu.

“Sistema ne’e klasifika ba parte 3 hanesan cyclone subtropical, cyclone extratropical no cyclone tropical,” nia hatutan.

Resposável ne’e hatutan, cyclone tropical jeralmente mosu iha rejiaun tropikál sira ka rejiaun ne’ebé iha temperatura tasi nian manas liu 26 grau sélciu hanesan illa Timór ne’ebé normalmente akontese entre ovembu no abríl.

Sistema refere kauza hosi movimentasaun anin (movimentasaun ár) iha zona baixa presaun atmosférika, ne’ebé anin manas (massa de ar quente) no (úmido) se eleva ba kamada ne’ebé a’as liu iha atmosfera.

Enkuantu, masa anin malirin no maran (menos denso) tun ba kamada ne’ebé ki’ik (camada mais baixa), nune’e provoka redusaun baixa presaun atmosfériku nian.

Enerjia suplementár ne’ebé halo sistema ne’e akontese mak tasi ne’ebé manas sei intensifika cyclone tropical devido liberasaun calor latente, iha konveksaun ne’ebé alimentada hosi evaporasaun iha superfisie tasi nian.

“DNMG mantein kolaborasaun di’ak ho Sekretária Estadu Protesaun Sivíl (SEPS) hodi nafatin prevene risku dezastre tuir system operation procedure (SOP) ne’ebé mak iha hanesan DNMG halo previzaun haruka baentidade kompetente hodi desimina ba pontu fokál dezastre ne’ebé eziste iha kada munisípiu inlui Dili,” nia subliña.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here