Komunidade Tasitoli.Imajen Tatoli/Antonio Goncalves

DILI, 13 abril 2021 (TATOLI)—Koordenadór Ekipa Emerjénsia Solidariedade Demokrátiku, Nino Pereira, husu ba timor-oan sira hamutuk fó liman ba malu hodi fó tulun ba vítima dezastre naturál, tanba akontesimentu inundasaun ne’ebé akontese halo semana ida ona ne’e fó impaktu maka’as ba komunidade nia moris.

Nino Pereira hatutan, iha situasaun ida-ne’e presiza bolu timor-oan hotu nia tulun tanba inundasaun ne’ebé akontese ne’e halo sidadaun balun lakon vida, barak mak lakon uma, sasán ne’ebé hetan estragu iha fatin-fatin liuliu iha Kapitál Dili.

“Ho akontesimentu ida-ne’e, bolu timor-oan hotu-hotu nia atensaun atu fó liman ba malu, tulun malu hodi halo kma’an timor-oan sira-ne’ebé afetadu ba inundasaun nia terus. Tanba ne’e, ita hotu-hotu bolu malu, hosi fuan ba fuan, oinsá ita bele servisu hamutuk ultra-pasa tiha situasaun defisil ida-ne’e,” Nino Pereira hateten ba jornalista sira liuhosi konferénsia imprensa, iha Sede Partidu Demokrátiku, Colmera, Dili, tersa ne’e.

Iha situasaun defisil nia laran ne’e, nia dehan, Partidu Demokrátiku (PD) nu’udar parte ida hosi Estadu Direitu Demokrátiku la tu’ur nonook, hodi hatudu sentidu solidaridade ba inan-aman, maun-alin, no bin-feton sira-ne’ebé afetadu hosi kalamidade klimátika ne’e.

Tanba, nia dehan, liuhosi orientasaun Prezidente no Sekretáriu Jerál Partidu Demoktrátiku nian hodi hamosu ekipa kiik ida hodi tuun ba terrenu observa no foti medida urjénsia fó apoiu ba komunidade afetadu sira iha segunda (05/04/2021).

“Apoiu ne’ebé PD ofese ne’e mak hanesan ai-han, foos saka 431, bee-moos, roupa ba ema kiik no boot, lona, no ai-moruk. Uma-kain ne’ebé durante ne’e ami fó apoiu hamutuk uma-kain 2.181 hosi suku 12 iha Munisípiu Dili no Liquiça. Liquiça nian ne’e, haree ba Beduco no Tibar nian mak PD fó ajuda,” nia dehan.

Nia argumenta, sasán hirak ne’ebé sira apoiu ba vítima sira la’ós apoiu hosi Governu maibé hosi doasaun kuadru militante partidu sira hodi tau kbiit hamutuk, nune’e bele realiza asaun solidaridade ne’ebé la’o ona durante semana ida.

Tanba ne’e, nia lori Prezidente no Sektráriu Jerál Partidu Demokrátiku nia naran hato’o agradese ba parte hotu-hotu ne’ebé kolabora no fó apoiu hodi realiza asaun solidariedade sira-ne’e.

“Ami agradese ba doadór sira-ne’ebé laran luak oferese ona sasán ba vítima sira. Agradese mós ba Polísia Nasionál Timor-Leste hosi Unidade Marítima ne’ebé fó apoiu ba vítima sira, Bombeiru no Xefe Aldeia sira, no komunidade hola inisiativa mai aprezenta difikuldade iha Sede Nasionál PD Colmera,” nia subliña.

Koordenadór Ekipa Emerjénsia Solidariedade Demokrátiku ne’e afirma, difikuldade liuliu fornesimentu ai-han no bee-moos ne’ebé sira oferese ba vítima sira rekuñese katak  komunidade afetadu iha fatin barak mak ladún hetan apoiu.

“Ita hotu nafatin iha esperansa ba Governu Hodi bele responde imediata preokupasaun povu tomak,” nia hateten.

Iha biban ne’e, Ekipa Emerjénsia Solidariedade Demokrátiku hato’o rekomendasaun ba Governu atu fó atensaun imediatamente no normaliza mota ne’ebé fó ameasa ba komunidade nia hela fatin hanesan iha Aldeia Lemorai (Dare), Tibar no fatin seluk tan.

“Governu presiza estabelese sentru atendimentu saúde iha área Tasi-Tolu hodi fó asisténsia saúde ba komunidade afetadu no estabelese mekanizmu koordenasaun apoiu ne’ebé di’ak ho autoridade suku no aldeia, atu nune’e komunidade afetadu sira bele hetan ajudu ne’ebé justu,” nia dehan.

Tanba, nia dehan, dala barak Ekipa Emerjénsia Solidariedade nia Demoktrátiku nia intervensaun iha terenu vítima sira barak mak la konsege hetan apoiu ka ajuda ai-han ne’ebé mak sira presiza tanba iha diskordenasaun.

“Ba oin, apoiu solidaridade ne’ebé sira halo sei kontinua fó apoiu mós ba komunidade afetadu balu hosi munísipiu seluk hanesan Ainaro, Baucau no Manatuto,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here