Trabailador sira rekolla hela lixu, Imajen/TATOLI

DILI, 13 abril 2021 (TATOLI)—Governu liuhosi Ministériu Administrasaun Estatál (MAE) sei adia halo rekrutamentu ba pesoál sira-ne’ebé atu hamoos lixu iha Sidade Dili, tanba Estadu Emerjénsia ne’ebé labele akumula ema liu na’in-10 no COVID-19 ne’ebé tenke tuir regra protokolu hosi Ministériu Saúde no Organizasaun Mundiál Saúde.  

Notísia Relevante: MAE sei rekruta ema na’in 2.170 atu hamoos Dili

Vise-Ministru Administrasaun Estatál (V-MAE), Lino de Jesus Torrezão, hateten tanba COVID-19 entaun Governu labele kontinua planu atu rekruta ema na’in-2.170 atu hamoos Sidade Dili, liuliu atu destaka ba suku 31 iha Munisípiu Dili no kada suku rekruta ema na’in-70 ne’e. 

“Ita labele kontinua ho rekrutamentu ba pesoál hamoos lixu iha sidade Dili tanba situasaun COVID-19. Nune’e, ita nafatin la’o ho pesoál na’in-20 ne’ebé antes ne’e MAE orienta xefe suku sira hodi hamoos lixu iha suku laran iha semana kotuk. Tanba COVID-19, Governu adia,” Vise-Ministru Administrasaun Estatál (V-MAE), Lino de Jesus Torrezão, hateten ba Ajénsia TATOLI, liuhosi telefónika, segunda ne’e.

Entretantu, Xefe Suku Camea, Postu Administrativu Cristo Rei, Munisípiu Dili, Matos da Costa, reforsa katak ema na’in-20 ne’ebé antes ne’e MAE orienta xefe suku sira rekruta hodi hamoos lixu iha suku laran ne’e, daudaun ne’e haruka para provizóriu hodi hein Governu nia planu loloos atu rekruta tan ema na’in-50 ne’e mak foin la’o dala ida.

“Orientasaun hosi Governu ne’ebé MAE orienta ba ami xefe suku sira atu hili ema na’in-20 hodi halo limpeza ne’e provizóriu hapara ona. Maibé, ita hein de’it bainhira iha ona solusaun ruma hosi MAE atu rekruta tan ema na’in-50 ne’e, hodi halo kompleta kada suku ida ema na’in-70 mak ita hahú implementa fali limpeza iha suku laran. Tanba ne’e mak agora ami hein de’it orientasaun hosu Governu,” nia hateten.

Xefe suku ne’e informa, pesoál na’in-20 ne’ebé halo limpeza iha suku laran ne’e hahú la’o iha tersa (06/04) semana kotuk, no MAE hapara fali iha sábadu (10/04) tanba sira ezekuta de’it orientasaun no palnu hosi Guvernu.

Oinsá kona-ba rekezitu ba rekrutamentu, xefe suku ne’e hateten, Governu orienta autoridade komunitária sira atu hili ema iha kada aldeia ida, entaun xefe suku sira tún ba aldeia foti ema hodi halo limpeza lahó rekezitu ruma.

“Tuir informasaun ne’ebé ami simu katak Governu planu atu rekruta ema na’in-50 hodi aumenta ba 20 mak foin estabelese rekezitu. Tanba ne’e, ha’u hanoin ita-nia Governu sei halo planu di’ak ida, hodi oinsá rekruta ema hodi halo limpeza iha Sidade Dili,” nia esplika.

Notísia Relevante: Governu orienta rekruta ema halo limpeza iha suku laran

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here