Kondisaun ponte ligasaun edifísiu Fundasaun Ahisaun no estrada iha Fatuhada, ne’ebé hadi’a ona, tersa (13/04)

DILI, 13 abríl 2021 (TATOLI)—Institutu Jestaun Ekipamentu (IGE, sigla portugés) hadi’a ona ponte ligasaun edifísiu Fundasaun Ahisaun, Fatuhada ba estrada, tanba konsege tohar hafoin inudasaun ne’ebé akontese iha domingu (04/04), halo ema ho difisiénsia sira iha ne’ebá labele halo movimentu.

“Parte IGE loron rua liubá hetan kontaktu hosi Señor Sildonio hanesan responsável fundasaun, husu ajuda ba institutu tula rai henek ba aterru iha sira-nia fatin no ami finaliza ona,” Prezidente IGE, Ermenegilda da Costa, iha ninia knaar fatin, Colmera, tersa ne’e.

Notísia relevante: Ponte Fundasaun Ahisaun kotu, difikulta movimentu ema ho difisiénsia

Nia dehan, kona-ba atu hadi’a ponte tomak, parte IGE seidauk hatene, maibé tékniku sira sempre prontu ajuda bainhira iha pedidu.

Iha sorin seluk, Fundadór Fundasaun  Ahisaun, Padre Adri Ola Doli, agradese tebes servisu IGE, tanba bele tulun hodi aterru filafali ponte iha fundasau ne’ebé antes ne’e a’at.

“Ha’u husu obrigadu ba iha parte IGE tanba bele ajuda ona mai hodi ateru ami-nia ponte, ida-ne’e bele ajuda maluk difisiénsia sira bele la’o ba mai,” nia dehan.

Daudaun ne’e, IGE halo intervensaun iha terrenu ne’ebé ho kondisaun a’at no difikulta asesu públiku.

Jornalista: Natalino Costa

Editora: Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here