Governu liuhosi Ministériu Finansa (MF) ho Ministériu Negósiu Estranjeiru no Kooperasaun (MNEK), Sekretaria Estadu Protesaun Sivíl (SEPS) no Sekretaria Meiu Ambiente (SEA), tersa ne’e, realiza sorumutuk ho parseiru internasionál sira iha Timor-Leste hodi informa no atualiza situasaun dezastre naturál ne’ebé akontese iha territóriu nasionál, domingu (04/04/2021). Imajen Tatoli/Nelson de Sousa

DILI, 13 abríl 2021 (TATOLI)-Governu liuhosi Ministériu Finansa (MF), Ministériu Negósiu Estranjeiru no Kooperasaun (MNEK), Sekretaria Estadu Protesaun Sivíl (SEPS) no Sekretaria Estadu Meiu Ambiente (SEA), tersa ne’e, realiza sorumutuk ho parseiru internasionál sira iha Timor-Leste hodi informa no atualiza situasaun dezastre naturál ne’ebé akontese iha  territóriu nasionál, domingu (04/04/2021).

Notísia Relevante : Governu agradese nasaun sira ne’ebé ajuda ona TL

Partisipa iha enkontru ne’ebé hala’o iha Ministériu Finansa, Dili, kompostu hosi korpu diplomátiku sira, organizasaun multilaterál sira hanesan Ajénsia Nasoins Unida (ONU) nian, Banku Mundial, Banku Aziátiku (ADB-siglá inglés) no seluk-seluk tan.

Diretór Jerál Jestaun Mobilizasaun Rekursu Externa hosi Ministériu Finansa, António Freitas, hateten Governu hato’o pontu situasaun ne’ebé mak TL enfrenta no planu programa saida mak atu haree fila-fali ba rekuperasaun hodi bele responde ba vitíma no estragu sira hosi dezastre naturál.

Nia dehan, programa tolu mak aprezenta ba parseiru sira hanesan;

  1. Planu programa ne’ebé halo imediatamente tau atensaun família afetadu iha sentru evakuasaun sira liu-liu ba nesesidade importante sira.
  2. Oinsá bele atu fó apoiu ba família ne’ebé daudaun hela iha sentru evakuasaun bele fila-fali ba sira-nia hela fatin.
  3. Aprezenta proposta kria empregu temporáriu ba populasaun iha área sira afetadu hanesan halo limpeza kada suku hodi bele hadi’a ekonomia família.

“Servisu hamutuk ho ADB no UNDP, embaixada Korea ho Ministériu Finansa, Sekretária Estadu Formasaun Profisionál no Empregu (SEFOPE) ho Ministériu Administrasaun Estatál (MAE) atu haree komesa kria empregu temporáriu,” António Freitas, informa ba Agência Tatoli.

Nia relata katak iha sorumutuk ne’e parseiru dezenvolvimentu sira hanesan ADB, UNDP, Embaixada Korea deklara konsege halo mobilizasaun por volta $1.4 millaun hodi bele loke auto-empregu temporáriu. Ho nune’e, populasaun la’ós de’it simu hahán no apoiu rekuperasaun ba sira-nia hela fatin, maibé fó mós empregu temporáriu hodi bele hadi’a ekonomia família.

Biban ne’e, MNEK aprezenta mós ba parseiru sira ba médiu ho longu prazu liu-liu aprezenta kona-ba infraestrutura ne’ebé estragu iha territóriu.

Nia dehan, sorumutuk ne’e pozitivu tebes parseiru dezenvolvimentu fó apresiasaun no iha situasaun dezastre naturál hakarak fó liman ba malu servisu hamutuk.

Jornalista            : Nelson de Sousa

Editór                  : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here