Líder nasionál Kay Rala Xanana Gusmão hakalma dezintendimentu entre Membru Polísia Nasionál Timor Leste (PNTL) ho família no joven-sira ne’ebé ezije Governu atu entrega mate isin Armindo Borges iha Sentru Izolamentu Vera Cruz, Dili, tersa (12/04). Imajen Tatoli/António Gonçalves.

DILI, 13 abríl 2021 (TATOLI) – Masa apoiante no solidariedade ba família matebian Armindo Borges (47) no apoia asaun lider karizmátiku Kay Rala Xanana Gusmão, tersa loraik ne’e, hamosu diskusaun no dezentendimentu ho autoridade seguransa Polísia Nasionál Timor-Leste (PNTL).

Notísia Relevante : Xanana Gusmão husu joven sira iha Vera Cruz hakmatek

Masa ne’ebé maioria juventude hakilar-malu ho membru PNTL sira ne’ebé asegura seguransa iha área Sentru Izolamentu Vara Krús, Dili, bainhira pesoál membru PNTL ida hosi Unidade Polísia Marítima (UPM) koko atu lori kilat ameasa juventude sira ne’ebé halibur-malu halo asaun pasífiku pro-asaun Xanana Gusmão.

Juventude  apoiante sira ne’ebé halo asaun hahú tuku 10:00 Otl to’o fali tuku 16:30 Otl, konsege mosu  dezentendimentu ki’ik, tanba lamenta ho atetitude pesoál UPM balun ne’ebé deskonfia hakbesik-an ba manifestante sira hodi hamosu konfrontu argumentu, ikus mai membru balun lori arma hodi ameasa fali manifestante sira.

Hosi ameasa ne’e, halo manifestante sira ne’ebé halo asaun fó solidariedade ba família vítima no Kay Rala Xanana Gusmão lamenta hodi hakilar hasoru polísia sira.

“Ami la simu polísia ne’e mai lori fali forsa hodi se kilat ba ami. Ami la halo krime. Ami mai atu fó solidariedade ba Maun Xanana ho família matebian nian, la’ós atu halo problema,” masa sira  hakilar hasoru polísia sira.

Haree dezentendimentu ne’e, Xanana hamriik hosi nia fatin ho eskolta Korpu Seguransa Pesoál (CSP) ho armada kompletu hakbesik-an ba manifestante hodi la’o foti liman hakalma manifestante bele kria paz hodi hein desizaun Governu nian kona-ba prosesu negosiasaun atu entrega mate-isin ba família hodi hala’o serimónia funerál.

Ho hirus, Xanana lakohi atu manifestante sira hakilar barullu, tanba bele kria fali problema ruma ne’ebé ema hotu lakohi.

“Imi nonook, horiseik, ita komporta kapás tebes, ita respeita polísia iha ne’e, polísia mós respeita tebes ita, ne’ebé ho orden, la’ós arbiru. Imi iha ne’e, la’ós atu fó viva mai ha’u. Ha’u mai atu buka rezolve problema ida liga ho COVID-19. Ne’e duni lalika hakilar, viva-viva,” Xanana lia tun ba manifestante sira.

Eis Prezidente Repúblika ne’e mós afirma tan katak ninia prezensa la’ós atu hatún Governu,  maibé hakarak bolu atensaun ba Governu katak, COVID-19 ne’e iha problema, tenke hadi’a halo buat ida loloos.

Xanana ho hirus duni fila membru UPM ho armada atu fila ba sira nia fatin hodi labele hamosu konfrontasaun argumentu no perturba atividade públiku sira.

“Polísia Marítima, imi fila, imi nia misaun ba haree tasi, ami iha ne’e horiseik kedas komporta di’ak, imi mai lori fali buat oin-oin, fila ona ba imi nia fatin hodi próteze ita-nia tasi,” Xanana hateten ho hirus.

Tuir observasaun Agência Tatoli iha terrenu nota katak membru UPM mós kumpre no rona orden hosi Xanana nian hodi fila ba sira nia fatin, no parte Polísia Unidade Batallaun Orden Públiku (BOP) no Taskforce Dili kontinua mantein hodi asegura seguransa iha área Setru Izolamentu Vera Krús.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here