Kondisaun Mota Comoro, dursnte inundasaun iha Dili, segunda (12/04). Imajen TATOLI/António Gonçalves

DILI, 12 abríl 2021 (TATOLI)—Relasiona ho inundasaun ne’ebé akontese kuaze iha munisípiu hotu iha domingu (04/04), Sekretaria Estadu Protesaun Sivíl (SEPS) ne’ebé toma konta atua vítima dezastre naturál, sempre fasilita apoia emerjénsia bá munisípiu afetadu.

Tuir Sekretáriu Estadu Protesaun Sivíl, Joaquim Gusmão, apoia ne’ebé SEPS fó hanesan ai-han no nesesidade bázika sira.

“Ita-nia apoia emerjénsia ba ai-han no sasán sira, stock iha kedan munisípiu ida-idak, maibé daudaun ne’e stock sira komesa menus ona, hanesan iha Rejiaun Administrativa Espesiál Oé-cusse Ambeno (RAEOA) mós komesa menus ona. Tanba ne’e, Prezidente Autoridade RAEOA aban ho Ró Susesu atu bá Oé-cusse, atu restock filafali apoiu emerjénsia sira iha ne’ebá,” Sekretáriu Estadu Joaquim Gusmão hateten iha Aeroportu Comoro, segunda ne’e.

Governante ne’e haktuir, dezde dezembru tinan kotuk bainhira akontese inundasaun iha minisípiu Covalima no Viqueque, SEPS fó kedan apoiu.

Aleinde ne’e, parte SEPS komunika ona ho Sala Situasaun-Sentru Integradu Jestaun Krize (CIGC, sigla portugés) atu autoriza lori sai ai-han ba munisípiu ne’ebé falta ai-han, relasiona ho implementasaun serka sanitária iha Dili.

“Hanesan iha munisípiu Liquiçá komesa husu ona, tanba stock armazen hahú menus, nune’e mós iha Aileu no munisípiu seluk tan ne’ebé maioria hahú menus ai-han, tanba ne’e automátikamente ita tenke apoiu duni,” nia akresenta.

Nia dehan, kada munisípiu sei hetan apoiu emerjénsia bazeia ba levantamentu dadus ne’ebé iha.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here