Polísia sira halo seguransa metin iha sentru Izolamentu Vera Cruz, Dili, segunda (12/04). Imajen TATOLI/Egas Cristóvão

DILI, 12 abríl 2021 (TATOLI)–Polísia Nasionál Timor-Leste (PNTL) kontinua asegura fatin izolamentu pasiente COVID-19 iha Vera Cruz hodi hein negosiasaun entre família matebian, ne’ebé reprezenta Xanana Gusmão no Governu liuhosi Sala Situasaun-Sentru Integradu Jestaun Krize (CIGC, sigla portugés).

Líder istóriku, Xanana Gusmão iha ona sentru izolamentu desde dadeer to’o kalan ne’e hodi defende lori sai mate-isin Armindo Borges (47), ne’ebé hakotu iis tanba COVID-19, atu haloot tuir tradisaun Timór, maibé CIGC no profisionál saúde sira hakarak haloot pasiente tuir protokolu saúde.

Notísia relevante: Komodoro Pedro Klamar Fuik konvense Xanana kona-ba mate-isin COVID-19

Komandante PNTL, Komisáriu Faustino da Costa, tun direta bá terrenu hodi enkoraja membru atu kontinua fó seguransa iha fatin izolamentu, hodi hein rezultadu negosiasaun.

Akompañmentu ne’e hodi evita grupu seluk keta iha intensaun atu tama situasaun ne’e hodi parte rua bele rezolve situasaun didi’ak.

Daudaun ne’e grupu maioria juventude kuaze atus, hein hela iha parte administrasaun munisípiu Dili hodi kontinua halo asaun protestu atu matebian entrega ba família. 

Ekipa PNTL ne’ebé halo seguransa kompostu hosi forsa konjunta Sala Situasaun CIGC no Unidade Batallaun Orden Públiku (BOP).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here