Profisionál saúde sira halo kampaña nasionál fase liman hodi prevene COVID-19 iha resintu HNGV. Imajen TATOLI/António Gonçalves

DILI, 12 abríl 2021 (TATOLI)—Primeiru-Ministru (PM), Taur Matan Ruak, enkoraja profisionál saúde sira atu kontinua servisu no lalika tauk ho presaun.

Xefe Governu ko’alia asuntu ne’e tanba akompaña hela situasaun iha sala izolamentu Vera Cruz, relasiona ho pasiente pozitivu COVID-19 ne’ebé hakotu iis iha domingu (11/04/) kalan, ne’ebé iha segunda dadeer, eis Prezidente Repúblika no eis Primeiru-Ministru, Xanana Gusmão, halo impedimentu hodi Governu labele lori ba haloot tuir protokolu saúde nian iha semitériu própriu COVID-19 nian iha Metinaro.

“Ha’u lamenta ho situasaun ohin iha Vera Cruz, devia ser ida-ne’e la podia akontese. Ha’u rona, ema balun komesa tuda ambulánsia no ita-nia ekipa liña frente sira, atitude ne’e sei la ajuda atu kombate moras ne’e iha ita-nia rain,” PM Taur hateten liuhosi nota imprensa ne’ebé Agência TATOLI asesu, segunda ne’e

Ho situasaun ne’e, daudaun hamosu sentimentu negativu públiku ba profisionál saúde sira tanba ema balun hahú reazen tuda ambulánsia sira no la fiar médiku sira.

Ba situasaun ida-ne’e, Xefe Governu enkoraja médiku sira no ekipa liña frente hotu atu kontinua firme servisu.

“Keta triste no lakon esperansa tanba Governu no Estadu iha hela ita-boot sira-nia sorin,” nia subliña.

Ba kestaun ne’e, Xefe Ezekutivu hakarak manifesta ninia solidariedade no apoiu tomak ba profisionál saúde no ekipa sira hotu iha liña frente iha Sala Situasaun, korajen no kontinua servisu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here