Ministru Finansa, Rui Augusto Gomes. Imajen TATOLI/Egas Cristóvão

DILI, 12 abríl 2021 (TATOLI)—Ministériu Finansa (MF) daudaun ne’e halo hela diskusaun ho Komisaun C (Finansa Públika) Parlamentu Nasionál (PN), halo ezersísiu reforsu finansia rekuperasaun estragu impaktu hosi dizastre naturál ne’ebé akontese iha domingu (12/04).

Tanba ne’e, Ministru Finansa, Rui Augusto Gomes, hasoru malu ho Primeiru-Ministru, Taur Matan Ruak, hodi simu orientasaun kona-ba finansiamentu planu rekonstrusaun.

“Ami-nia parte finansa buka finansiamentu, ida-ne’e mak ha’u-nia knaar. Iha sesta liubá Primeiru-Ministru konvoka reuniaun no forma ona ekipa atu halo planu rekonstrusaun, entaun hosi parte Ministériu Finansa nian mak buka osan,” Ministru Rui Augusto Gomes, informa iha Palásiu Governu, segunda ne’e.

Tuir governante ne’e, orsamentu retifikativu ne’ebé Governu prepara no submete ona iha PN labele muda.

“Governu submete iha loron 29 marsu, enkuantu dezastre naturál ne’e akontese iha loron 04 abríl, ita hotu la espera. Entaun momentu aprezentasaun iha plenária ha’u hateten katak ita tenke tau-matan rezolve kestaun relasiona ho estragu impaktu inundasaun hanesan populasaun nia uma, sasán, infraestrutura públika no estragu seluk tan,” nia akresenta.

Notísia relevante: Governu aprezenta Orsamentu Retifikativu millaun $223 ba PN

Ministru dehan, atu finansia estragu, iha posibilidade halo re-alokasaun osan ne’ebé posibilidade la uza to’o tinan ne’e nia rohan atu reforsa filafali fundu rezerva kontijénsia.

“Hosi fundu ne’e maka ami sei halo atividade rekonstrusaun. Ami halo ezersísiu hela no daudaun diskute ho komisaun C no semana ne’e nia laran mós ho komisaun sira seluk. Ami sei identifika pur volta millaun $100-resin ba faze ida-ne’e. Konserteza to’o fim do ano ita sei la ezekuta hotu, entaun ita mós sei prepara ba orsamentu 2022 iha maiu, juñu no jullu sei prepara,” nia esplika.

Nia informa, fundu kontijénsia daudaun ne’e iha millaun $16, tanba ne’e tuir nia sei la to’o no presiza reforsu.

“Sei hanoin karik iha tinan kotuk bainhira ha’u defende Orsamentu Jerál Estadu, ha’u hateten ita-nia fundu kontijénsia tuir loloos 5% hosi valór totál orsamentu maibé tun ba 0,9%. Ida-ne’e mak agora akontese ne’ebé tenke reforsa filafali osan ida ne’e,” nia hatutan.

Notísia relevante: Fundu rezerva kontijénsia 2021 la sufisiente

Maski nune’e, MF seidauk halo kálkulu estragu kauza dezastre naturál tanba daudaun ne’e ekipa kontinua halo levantamentu atu identifika loloos estragu ne’e ninia folin hira no tékniku hosi Ministériu Obra Públiku (MOP) mak sei kuantifikasaun.

Semana ida-ne’e nia-laran sei diskute kona-ba rejime espesiál ba aprovizionamentu rekonstrusaun infraestrutura públika sira.

“Seidauk simu proposta ruma hosi ministériu sira relasiona ho estragu sira tanba levantamentu ne’e la’o daudaun, parese semana rua ou tolu tan karik mak bele hetan dadus sira,” Rui katak.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here