Vise-Ministra Finansa, Sara Lobo Brites. Imajen Tatoli/Egas Cristovão

DILI, 12 abríl 2021 (TATOLI)—Governu liuhosi Ministériu Finansa (PN) husu kontribuisaun reprezentante povu sira kona-ba orsamentu atu halo finansiamentu ba dezastre naturál ne’ebé Estrada infraestrutura iha territóriu nasionál.

Vise-Ministra Finansa Sara Lobo Brites hateten, proposta orsamentu retifikativu ne’ebé Governu aprezenta ba Parlamentu Nasionál iha loron 29 marsu, maibé dezastre naturál akontese iha loron domingu (04/04).

“Iha tempu ne’ebá la prevee duni akontesimentu ne’ebé fó impaktu maka’as ba ita-nia sosiedade no mós infraestrutura iha territóriu tomak. Ami haree katak proposta-alterasaun ne’e ho deputadu sira-nia kontribuisaun aproveita bele solusiona orsamentu hodi responde lalais danu sira-ne’ebé mak akontese durante inundasaun ne’ebé afeta territóriu nasionál,” Vise-Ministra Finansa, ko’alia iha Parlamentu Nasionál, bainhira halo audiénsia ho Komisaun C (Finansa Públika) kona-ba proposta-alterasaun ba Lei OJE 2021, segunda ne’e.

Nia esplika, oras ne’e Ministériu Finansa (MF) liuhosi dirasaun planeamentu servisu hamutuk ho Unidade Planeamentu Monitorizasaun no Avaliasaun (UPMA) identifika hela programa sira-ne’ebé merese ba situasaun atuál no mós ho COVID-19.

“Ami atu identifika atividade no programa sira-ne’ebé mak iha 2021 provavelmente sei la konsege ezekuta no bele esplora ida-ne’e atubele reforsa fali orsamentu hodi responde ba dezastre naturál nian,” nia dehan.

Vise-Ministra Finansa ne’e fó-sai katak, situasaun kalamidade rua sei kontribui ba ezekusaun ne’ebé mak kiik tanba haree númeru pozitivu kontinua aumenta, no mós medida ne’ebé Governu implementa konserteza sei kontribui mós ba ezekusaun ne’ebé mak kiik iha 2021.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here