Logotipu FONGTIL

LIQUIÇA, 12 abríl 2021 (TATOLI) – Koordenadór FONGTIL, Ivo Colimau Lay Costa, segunda ne’e, iha Liquiça, hala’o sorumutuk ho rede sosiedade sivíl Munisípiu Liquiça hodi koalia kona-ba oinsá atu prepara ba desentralizasaun.

“Ami mai hodi konvoka reuniaun ezekutivu organizasaun sosiedade sivíl iha Liquiça ne’e hanesan kalendáriu komún ona no dezeñada hodi hatene kona-ba mobilizasaun atividade rede sosiedade sivíl iha ne’e oinsá husu sira-nia hanoin kona-ba preparasaun ba desentralizasaun,” Ivo Colimau Lay Costa hateten ba Agência Tatoli iha Liquiça.

Iha parte seluk atu buka hatene mós kondisaun Estadu Emerjénsia ne’ebé Governu aplika no serka sanitaria iha Dili oinsá sosiedade sivíl sira-nia haree ba povu Liquiça nia moris.

Ivo Colimau informa matéria importante ne’ebé FONGTIL konsege hetan iha diskusaun ne’e mak hanesan iha Liquiça maioria povu hakarak Governu realiza lalais desentralizasaun no Estadu Emerjénsia no Serka Sanitaria ne’ebé Governu deside fó impaktu ba ekonomia iha Liquiça no seluk tan.

Matéria importante hirak ne’ebé rekolla ona, Ivo Colimau hateten, sei formula ba submisaun sira hanesan rede sosiedade sivíl iha Liquiça tenke submete ba autoridade munisipál no FONTIL sei lori matéria hirak ne’e ba nasionál liu-liu parte kompetente mak hanesan órgaun lejizlativu, órgaun ezekutivu atu haree ba kestaun ne’ebé komunidade sira enfrenta.

Iha fatin hanesan, Prezidente Board Rede Sosiedade Sivíl Liquiça, António Jeronimo hateten, reuniaun ne’e diskute kona-ba ajenda rua mak hanesan desentralizasaun no Estadu Emerjénsia no Serka Sanitáriu ne’ebé hala’o hela.

“Ami iha ona rekomendasaun lubuk ida, liu-liu ami ezije atu kria duni desentralizasaun iha Liquiça tanba ami haree rekursu umanu ami nian ne’e sufisiente no rekursu naturaís mós sufisiente,” nia hateten.

Nia husu ba lider polítiku no autoridade munisípiu, veteranu sira hotu ne’ebé influensia iha Liquiça tenke fó liman ba malu ho sosiedade sivíl nune’e bele lori Liquiça ba oin.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here