Família matebian Armindo Borges (47), hein hela iha sala izolamentu Vera Cruz, ezize Governu atu labele hakoi mate-isin iha Metináro, segunda (12/04/21). Imajen Tatoli/Egas Cristóvão.

DILI, 12 abríl 2021 (TATOLI)—Sala Situação Centro Integrado Gestão de Crise (SS-CIGC), liu hosi Koordenadór Forsa-Tarefa ba Prevensaun no Mitigasaun, Rui Maria de Araújo karifika, katak semitériu espesiál ne’ebé Governu prepara hodi haloot mate-isin ne’ebé kauza hosi COVID-19, bazeia ba rekomendasaun Organizasaun Mundiál Saúde (OMS).

Tanba ne’e, pozisaun SS-CIGC mantein sei haloot mate-isin Armindo Borges (47), iha semitériu ne’ebé Governu prepara iha Metinaro, nune’e labele tau risku ba ema barak, liu liu família matebian.

Notísis relevante:Ministra Saúde husu Xanana atu fiar COVID-19

“Konsiderasaun  sientífiku hodi adpota protokolu funerál espesiál  tuir rekomendasaun OMS, ne’ebé dehan, ema mate ona tenki tau fatin espesiál. Tanba e’e mak MS no apoiu hosi SS-CIGC liu hosi Forsa Tarefa Prevensaun Mitigasaun, marka  nafatin  pozisaun katak, tenki lori ba halo funerál iha fatin espesífiku,” Rui Maria de Araújo, hato’o liu hosi konferénsia imprensa iha Centro Convenções Dili (CCD), segunda ne’e.

Nia esplika, pontu de vista saúde kompriende kona-bá preokupasaun ne’ebé família-sira hato’o, maibé evidénsia sientífika labele nega no hakarak hato’o ba públiku katak, Forsa Tarefa Prevensaun Mitigasaun Surtu COVID-19 no mós MS sei obedese ba rekomendasaun OMS.

Kona-bá kronolojia hosi matebian Armindo Borges, doutór Rui Araújo, hateten horikalan sidadaun ne’e hakotu iis iha izolamentu Vera Cruz, tanba nia tensaun 140 to’o 190.

Frekuénsia respirasaun  aas, bazeia ba relatóriu hosi médiku-sira iha sala emerjénsia, ne’ebé hatudu katak, kabén suli maka’as, ran sai hosi tilun, hodi ema na’in-tolu ne’ebé akompaña, rezultadu na’in-rua tenke pozitivu COVID-19.

“Ohin iha inisiativa hosi família atu kestiona, entaun prosedimentu normál ne’ebé hala’o mós hanesan  sira ne’ebé mak akontese antes. Molok atu lori ba prosesu funerál tuir protokolu COVID-19, ita hasai mós amostra atu halo teste no amostra ne’e rasik ita hasai iha oras 11:00,” médiku ne’e esplika.

Amostra ema mate ne’e mós hatudu teste PCR pozitivu no ninia CT cycle threshold konfirma ho baze  sientífika katak, bainhira ema ne’e iis atu kotu, virus  ne’e iha hela isin replika ka multiplika lalais liu-tan, tanba komprovadu hosi rezultadu CT ne’ebé  antes atu mate to’o 25.1.

“Depois, mate tiha teste fali ninia  CT 18,6, signifika multiplika maka’as los  no risku ba saúde públika bainhira hakarak hakoi ho kultura tradisionál,” nia subliña.

Iha fatin hanesan Diretór SS-CIGC, Brigadeiru Jenerál João Miranda Aluk rekoñese katak, loos duni hotu-hotu sente lakon, maibé husu ba família matebian atu kolabora ho MS, nune’e moras ne’e labele da’et ba família no komunidade.

“Husu família atu koopera ho Estadu, atu bele halo tuir regra protokolu ne’ebé fó-sai hosi Ministériu Saúde no OMS,’’ Brigadeiru Jenerál João Miranda Aluk husu.

Jornalista: Felicidade Ximenes

Editor: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here