Aviaun tula apoia umanitária hosi Austrália to’o ona iha Aeroportu Comoro, segunda (12/04). Imajen TATOLI/Natalino Costa

DILI, 12 abril 2021 (TATOLI)—Apoia umanitária dahuluk ba vítima dezastre naturál hosi Territóriu Norte Austrália, Darwin, to’o ona iha Aeroportu Internasionál Prezidente Nicolau Lobato, Comoro, Dili, iha tuku 12:30 Airnorth.

Tuir Sekretariu Estadu Protesaun Sivíl,  Joaquim Gusmão, sasán ne’ebé mai hanesan nesesidade bázika ba vítima inundasaun ne’ebé akontese iha domingu (12/04).

“Apoiu ne’e hosi ita-nia maluk Veteranu Austrália no INTERFET ne’ebé antes ne’e mai serbisu iha Timor-Leste no ita-nia komunidade timor-oan ne’ebé hela iha Darwin, ne’ebé halibur sasán hodi haruka mai,” Sekretáriu Estadu Joaquim hateten iha Aeroportu Comoro, segunda ne’e.

Veteranus Austrália komprometidu esforsu atu fó apoia umanitária ba Timor-Leste iha tempu tuir mai.

“Reprezentante Veteranu Austrália ko’alia ho ita katak ida-ne’e hanesan apoiu dahuluk no sira nafatin ezije ba sira-nia Governu atubele fó apoiu lalais mai ita-nia komunidade ne’ebé maka afetadu inundasaun,” nia akresenta.

Apoia hirak ne’e sei kanaliza ba  Diresaun Opersaun Jetaun Risku Dezastre iha Sekretaraia Estadu Protesaun Sivíl (SEPS) atu hahú fahe ba vítima inundasaun sira.

Sasán simu direta hosi Sekretáriu Estadu Joaquim inklui ekipa hosi Ministériu Negósiu Estranjeiru no Koopersaun (MNEK).

Entretantu, tuir nota hosi Embaixada Timor-Leste iha Austrália, apoiu ne’e komunidade timor-oan iha Darwin no belun sira hosi Portugal no Austrália mak kontribui hanesan ai-moruk no ekipamentu esensiál sira iha kaixa hamutuk 70.

Inisiativa mai hosi Veranu Austrália, ne’ebé organiza sein apoiu Governu Autrália, hodi aluga rasik aviaun transporta sasán mai Dili.

Koordenadór Eis Major Australianu no Konsul Honorariu iha Queensland, Michael Stone, haktuir, nia ho nia maluk sira buka dalan oin-oin atubele apoia lalais Povu Timor-Leste atu hamenus terus ba sira ne’ebé lakon uma no lakon sasán uma laran no haree oinsá atu prevene hasoru moras barak hafoin inundasaun.

Apoia ne’e mai hosi Veteranu barak inklui sidadaun Austrália, tanba akompaña situasaun Timor-Leste.

Onoráriu Konsul Timor-Leste iha Queensland, Michael Stone, hateten, nia parte sente triste no laran kanek haree sakrifísiu timor-oan.

“Belun boot metin Timor-Leste iha Austrália, tanba ne’e ami sei tenta tenta nafatin no husu maka’as apoiu internasionál hodi apoia ba kalamidade públika daruak ne’e.

Nia parte mós akompaña dezafíu ne’ebé timor-oan sira enfrenta, ne’ebé populasaun barak sei moris iha tahu laran.

“Situasaun hanesan ne’e sei hamosu moras barak no ami lakoi husik ida-ne’e akontese. Ita boot sira la mesak ida no ami sei la kole buka dalan seluk atu apoia tanba ami hadomi imi. Hela forte, hela seguru, kuidadu moras Coronavírus tanba ne’e moras sériu duni. Ita sei hakaat dezafíu ne’e hamutuk,” nia enkoraja.

Iha sorin seluk, Embaixadora Timor-Leste iha Austrália, Inês Almeida, rekoñese no valoriza esforsu boot hosi komunidade timor-oan iha Darwin no apresia tebes jestu solidariedade espesiál hosi belun australianu no mós hosi belun portugués sira iha tempususar ida ne’e.

“Ida-ne’e ezemplu boot solidariedade australiana ne’ebé hahú hosi sira ne’ebé mai funu iha Timor-Leste, iha Guerra Mundial daruak, habelar maka’as tebes iha tempu luta libertasaun nasional, iha tempu INTERFET no haburas to’o agora,” nia dehan.

Diplomata ne’e konsidera, amizade ida kle’an no metin ba beibeik tanba timor-oan sira hatene habelar relasaun umana ho sidadaun australianu sira.

“Iha tempu ne’ebé de’it, hahú hosi 40.000 ne’ebé mate iha funu boot daruak tanba apoia soldadu australianu sira iha Timor-Leste. La iha buat ida bele hakotu amizade espesiál entre solidariedade australiana no povu,” nia akresenta.

 Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here