Prezidente Parlamentu Nasionál, Aniceto Longuinhos Guterres Lopes, bainhira simu vasina AstraZeneca dose dahuluk iha sentru saúde bairru Formosa, kuarta (07 abríl 2021). Imajen Tatoli/Antonio Gonçalves.

DILI, 12 abríl 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, hateten vasinasaun AstraZeneca halo kapasidade imunidade sa’e, tanba ne’e sidadaun hotu-hotu tenke kontribui no kolabora programa importante ne’e.

“Liutiha vasina ne’e, iha duni reasaun iha ita-nia isin hanesan liman todan, isin manas ka malirin no seluk tan. Maibé, ne’e nu’udar efeitu hosi aimoruk nia sirkulasaun iha ita-nia isin. Efeitu hirak ne’e sei lakon no ita-nia kapasidade imunidade aumenta hodi hamate virus ne’e,” Prezidente Parlamentu Nasionál informa liuhosi konferénsia imprensa, iha uma fukun, segunda ne’e.

Nia husu ba sidadaun hotu-hotu atu hakmaan-aan ba simu vasina ne’e bainhira to’o iha komunidade sira-nia postu, suku ka aldeia.

Prezidente Parlamentu Nasionál fó korajen no fiar katak vasina ne’e di’ak ba ema hotu no fiar ba médiku no pesoál saúde nasionál no internasionál sira, ne’ebé hala’o sira-nia kna’ar iha laboratóriu no rezultadu servisu bazea de’it ba estudu sientífiku.

Tamba ne’e, Estadu iha autoridade tomak atu asegura situasaun hotu relasiona ho Covid-19 iha Timor-Leste.

Nu’udar Prezidente Parlamentu no lori órgaun Soberania ne’ebé reprezenta Povu nia fatin, ho laran tomak husu ba sidadaun hotu-hotu atu halakon hanoin negativu kona-ba aimoruk ne’e, lalika fiar iha informasaun falsu sira-ne’ebé hanaruk impaktu negativu hosi virus ne’e ba ita-nia moris.

Nune’e mós fó konfiansa ba Estadu no ba Governu pesoál saúde sira-nia esforsu no ho laran kmaan hakbesik-aan hodi simu vasina ne’e, tanba Estadu no Governu halo esforsu hotu-hotu hodi salva sidadaun hotu-hotu hosi virus ida-ne’e.

“Laiha Estadu ida, Governu ida mak halo esforsu, gasta osan hodi buka aimoruk ida ba estraga nia povu rasik. Vasina AstraZeneca ne’ebé ita hili, hetan análize, teste hosi matenek sira kona-ba virus, hosi Organizasaun Mundiál Saúde no sukat ho ita-nia kondisaun fasilidade saúde nian, sukat ho ita-nia klima, sukat ho aimoruk nia manutensaun tuir ita-nia klima,” nia katak.

Notísia Relevante:  PM Taur sente forte bainhira simu tiha vasina AstraZeneca

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here