Médiku-sira kontinua halo teste saúde ba vizitante iha Aeroportu Internasionál Nicolao Lobato, Comoro, Dili, kuarta (02/09/20). Imajen/António Gonçalves.

DILI, 12 abríl 2021 (TATOLI)—Asosiasaun Médiku Timor-Leste (AMTL), deklara sei la hakiduk atu kombate surtu COVID-19, liuliu serbí pasiente-sira ne’ebé iha hela sala izolamentu no kuarentena.

“Ami sei hala’o nafatin serbisu tanba ami profisionál saúde nunka hakiduk. Ami husu apoiu hosi líder no komunidade tomak, nune’e ami labele lakon esperansa hodi kombate surtu ne’e,’’ Prezidente AMTL, André Belo deklara liu hosi konferénsia imprensa iha Bidau-Toko Baru, segunda ne’e.

Notísia relevante:AMTL husu líder nasionál-sira apoia serbisu médiku kombate COVID-19

André Belo klarifika katak, pesoál saúde hotu-hotu ne’ebé serbisu ba prevensaun COVID-19, nunka pertense ba polítika, maibé hala’o serbisu profisionál tuir profisaun. Tanba ne’e, médiku-sira sei la hakiduk atu atende pasiente iha kualkér situasaun.

Nia mós deklara katak, informasaun-sira ne’ebé fó-sai hosi Minsitériu Saúde (MS) kona-bá COVID-19, bazeia ba evidénsia no estudu sientífiku ne’ebé iha ho nia rezultadu mai hosi Laboratóriu Nasionál Saúde (LABNAS).

Nune’e, AMTL husu ba líder nasionál-sira, polítiku-sira inklui povu tomak atu fó apoiu másimu ba serbisu umanizmu ne’e.

Entretantu, Sala Situação Centro Integrado Gestão de Crise (SS-CIGC), fó-sai rezultadu kazu pozitivu foun ne’ebé detetadu iha ohin,  hamutuk 28, rekoperadu 29 no kazu ativu 544.

Notísia relevante:COVID-19: kazu foun 28, ativu 544

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here