Ministra Saúde, Odete Maria Freitas Belo. Imajen/Mídia MS.

DILI, 10 abríl 2021 (TATOLI)—Ministéiru Saúde (MS) liu hosi Servisu Saúde Munisípiu Dili koloka pesoál saúde hodi fó asisténsia saúde ba abitante sira ne’ebé afetadu ba dezastre naturál ne’ebé oras ne’e evakua no refujia iha sentru evakuasaun sira-ne’ebé namkari iha Dili.

“Fatin sira ne’ebé ema la konsentra barak ida ne’e ita halo klínika movél vizita de’it maibé iha sentru ne’ebé ema barak ita tau sentru saúde hanesan fatin evakuasaun João Paulo II no Lagoa Tasi Tolu, hodi nune’e bele fó asisténsia saúde ba komunidade sira ne’e,” Ministra Saúde, Odete Maria Freitas Belo, hateten ba jornalista sira bainhira halo vizita ba komunidade afetadu dezastre natural iha Lagoa Tasi-Tolu, Dili, sábadu ne’e.

Ministra Saúde ne’e hateten, fatin sentru evakuasaun sira-ne’ebé mak ema konsentra ladún barak ka númeru ne’ebé mak ki’ik-oan ne’e, sei halo klinika movel atu nune’e pesoál saúde sira bá vizita iha dadeer ka dalaruma karik iha kazu emerjénsia ne’ebe presiza tulun hosi profisionál saúde sira.

“Ita la halo sentru hanesan ne’e, sentru ida-ne’e ita halo tanba nia bele kobre ita-nia maluk sira-ne’ebé mak iha João Paulo II no iha mós Tasi-Tolu iha parte lagoa sorin. Maibé ami mós hakarak haree iha parte ida-ne’ebá karik ami tenke ho bero atu fasilita ami ba-mai. Fatin sira-ne’ebé mak konsetrasaun ema-nian ki’ik, daudaun ne’e ami halo klinika móvel de’it,” nia dehan.

Hafoin vizita tiha Masilidun, ministra hamutuk ho ekipa bá vizita mós vítima sira iha Bairru Lagoa-Ida iha Aldeia 12 Outobru, Tasi-Tolu hodi observa fatin no sei harii tenda postu saúde nian ida atu bele fó atendimentu ba komunidade sira-ne’ebé mak moras liuliu ba inan isin rua no labarik kiik sira.

Fatin ne’ebé sai evakuasaun ba família afetadu dezastre naturál durante ne’e hamutuk 19 mak hanesan Sentru Formasaun Don Bosco Comoro, João Paulo II, Ministéiru Finansa, INFORDEPE, eskola sekundária 4 Setembru Balide no selu-seluk tán.

Jornalista: Nelson de Sousa 

Editór: Cancio Ximenes

HAKEREK NO HATÁN

Please enter your comment!
Please enter your name here