Ministru Edukasaun Juventude no Desportu, Armindo Maia.Imajen/Antonio Goncalves.

DILI, 10 abríl 2021 (TATOLI)–Ministru Edukasaun Juventude no Desportu (MEJD), Armindo Maia, husu ba vítima dezastre naturál hamutuk 1.809 atu kuidadu nafatin fasilidade no sasán sira iha sentru evakuasaun iha eskola haat no edifísiu INFORDEPE nian.

Vítima dezastre naturál ne’ebé refujia iha eskola haat inklui INFORDEPE total populasaun hamutuk 1,809 ne’e mai hosi xefe familia hamutuk 353. Iha INFORDEPE rejista populasaun 589 hosi xefe família 112, Eskola ESJ 4 Setembru iha populasaun hamutuk 235 hosi xefe família 45, EBF Metiaut na’in 85 hosi uma kain 15, EB/ESJ 10 Desembro iha populasaun na’in-64 hosi xefe família hitu (7) no EBF 12 Outubro iha populasaun 836 hosi xefe famíla 174.

Notísia Relevante: MEJD-UNICEF fó apoiu umanitária ba vítima dezastre naturál hamutuk 1.809

“Ita la bandu populasaun sira atu uza fasilidade Estadu nian hanesan iha eskola no edifísiu INFORDEPE maibé ita husu de’it ba populasaun sira atu nafatin kuidadu sasán sira iha fain evakuasaun liuliu iha eskola ka edifísiu INFORDEPE ne’e,” Armindo Maia hateten ba jornalista sira iha Eskola EB/ESJ 10 Dezembru Comoro, Dili, sábadu ne’e.

Govenante ne’e esplika, sasán sira-ne’ebé iha sentru evakuasaun hanesan iha Eskola no Edifísiu INFORDEPE mak hanesan kadeira no meza, vidru, ahi, odamatan no janela, refujiadu sira tenke kuidadu no asegura tanba sasán sira-ne’e Governu sosa ho Estadu no povu nia osan.

Aleinde ne’e, ministru ne’e husu ba inan-aman sira atu kuidadu nafatin oan sira iha situasaun kalamidade ne’e, no labele husik labarik sira ba asesu fatin ne’ebé risku tanba kondisaun reál ne’ebé iha seidauk garante 100%.

Nune’e mós, nia apela ba vítima dezastre naturál sira hotu ne’ebé hela iha sentru evakuasaun sira iha Dili, atu nafatin kumpre regra protokólu hosi Organizasaun Mundial Saúde (OMS) no Ministériu saúde hodi asegura ema hotu hosi pandémia COVID-19 ne’e.

Jornalista: Tomé Amado

Editór: Cancio Ximenes

 

+28

PUBLISIDADEiklan

HAKEREK NO HATÁN

Please enter your comment!
Please enter your name here