iklan

NASIONÁL, DILI, HEADLINE, KAPITÁL, POLÍTIKA

Konsumu bee-masin, komunidade Maslidun husu Governu apoiu bee-moos

Konsumu bee-masin, komunidade Maslidun husu Governu apoiu bee-moos

Komunidade bairu Maslidun hosi Aldeia 12 de Outubro, Suku Comoro, Postu Administrativu Don Aleixo, Munisípiu Dili, ho bero hakur liu Lagoa Tasi-Tolu hodi buka bee-moos iha rai-maran. Imajen Tatoli/Joanico de Araújo.

DILI, 11 abril 2021 (TATOLI)—Udan ho intensidade boot ne’ebé hamosu inundasaun iha domingu (04/04), halo komunidade bairu Maslidun iha Aldeia 12 de Outubro, Suku Comoro, Postu Administrativu Don Aleixo, Munisípiu Dili, to’o agora la asesu bee-moos.

Xefe Juventude Aldeia 12 de Outubro, Jacinto dos Santos da Costa, hateten komunidade Maslidun presiza urjentemente Governu fó apoiu bee-moos tanba daudaun ne’e komunidade balun konsumu de’it bee-masin, tanba Lagoa Tasi-Tolu agora sai ida-de’it ona ne’ebé difikulta komunidade labele halo movimentu hodi la’o ain atu hetan bee-moos ruma. 

Notísia Relevante: Xanana mobiliza kompañia lori mangeira hasai bee iha Lagoa Tasi-Tolu

Xefe Juventude Aldeia 12 de Outobro, Jacinto dos Santos da Costa. Imajen Tatoli/Joanico de Araújo.

“Bairu Maslidun daudaun ne’e ba hahan sufisiente tanba hetan apoiu hosi Governu no kompañia balun. Maibé ba bee-moos mak ami araska tebes tanba desde akontese inundasaun to’o agora Lagoa Tasi-Tolu bee nakonu nafatin, entaun ida ne’e difikulta tebes ami atu hetan bee-moos. Tanba ne’e, ami husu Governu urjentemente fó apoiu bee-moos ba ami tanba bee laiha. Dala ruma komunidade balun konsumu bee-masin,” Jacinto dos Santos da Costa hateten ba Agência TATOLI iha Tasi-Tolu, Dili, sabadu ne’e.

Nia hatutan, daudaun ne’e bee-moos iha, besik Uma Adat Tasi-Tolu nian maibé dalan laiha ba komunidade atu asesu sai ba kuru bee, entaun ida-ne’e difikulta tebes ba komunidade-nia moris.

“Iha ne’e bee-moos iha. Maibé iha liu ba rai maran besik uma adat Tasi-Tolu nian, entaun ita atu ba kuru bee tenke ho bero. Maibé, ho bero hosi Unidade Polísia Marítma ne’ebé fó apoiu ne’e, komunidade Maslidun halo movimentu entaun di’ak tanba la selu. Maibé ho bero kiik privadu sira ne’e tenke selu, ema ida selu $1 maibé ho sasán entaun selu $2,” nia dehan.

Iha fatin hanesan, komunidade Domingos Moniz hateten, problema boot ne’ebé komunidade Maslidun hasoru semana ida ona mak menus bee-moos ne’e. Tanba, agora buat hotu depende ba bero, atu la’o ba-mai ladi’ak entaun komunidade bele mate tanba bee-moos araska.

“Ami husu ba Governu importante liu mak ajuda ami ho bee-moos ne’e. Tanba, desde akontese inundasaun to’o agora, ami la asesu ba bee-moos. Governu liuhosi minist’eriu relevante ruma mós to’o agora seidauk lori bee-moos mai ami. Ami iha ne’e hemu bee-moos bainhira ema ne’ebé fó apoiu ami ho bee kaixa sira-ne’e. Tanba, atu hetan bee-moos tenke selu bero mak foin hetan bee-moos, maibé ami mós osan laiha,” nia hateten.

Entaun, nia dehan, komunidade ne’ebé osan iha uitoan mak sira selu bero ba kuru bee iha rai maran mak lori mai, maibé hirak ne’ebé laiha osan pasiénsia konsumu ho bee-masin.

Daudaun ne’e, komunidade Maslidun ne’ebé sai vítima ba inundasaun to’o agora uma labele hela, hamutuk uma-kain 260 ne’ebé agora daudaun hela iha sentru evakuasaun Maslidun.

Iha parte seluk, komunidade José Afonso hateten, bairu Maslidun aleinde presiza bee-moos, presiza moos Governu bele adi’a lalais dalan atu komuidade bele asesu fali hodi la’o ba-mai. 

Komunidade bairu Maslidun, José Afonso. Imajen Tatoli/Joanico de Araújo.

“Husu Governu aleinde haree bee-moos, haree mós ba difikuldade seluk hanesan dalan. Tanba bainhira dalan iha maske bee tama komunidade-nia uma mós sente kmaan, tanba bele halo viajen ba-mai,” nia hateten.

Maibé, nia dehan, agora uma mós bee tama to’o agora nafatin hela de’it no dalan mós laiha, ida-ne’e difikulta tebes ba komunidade nia moris.

“Tanba ami iha ne’e afetadau ba inundasaun ne’e iha rua mak afetadu. Komu hanesan asesu ba dalan laiha no afetadu direitu ne’e mak hanesan maluk sira-ne’ebé bee tama uma to’o agora labele hela nia uma no evakua ba hela ho viziñu no baluan sai refujiadu,” nia informa.

Tanba ne’e, nia husu Governu ba oin tenke buka fatin ne’ebé seguru tau hamutuk vítima inundasaun sira-ne’e, atu nune’e ajuda ruma iha bele ajuda diretamentu ba sira.

Nia hatutan, durante semana ida ona apoiu ne’ebé sira hetan mak hosi Governu liuhosi Ministériu Solidaridade Sosiál no Inkluzasaun (MSSI), maibé ajuda ne’ebé tama barak ne’e hosi kompañia sira no pesoál balun mak hanesan foos, lona, lipa no biti, maibé agora sira sei presiza nafatin hosi Governu tanba daudaun ne’e seidauk sufisiente.

“Sasán sira-ne’e tama iha ne’e, ita fahe fali ba komunidade ne’ebé kondisaun grave liu. Ohin, ita hetan tán apoiu bee aqua kaixa 20 no nasi kotak hosi FALINTIL-Forsa Defeza Timor-Leste (F-FDTL), maibé ida ne’e ami mós lahetan autorizasaun fahe diretamente tanba sira rasik mak sei ezekuta ne’ebé ami dalaruma ajuda de’it sira,” nia dehan.

Notísia Relevante: F-FDTL apoiu bero fasilita-transporta abitante sira iha Lagoa Tasi-Tolu

Jornalista: Arminda Fonseca

Editór: Cancio Ximenes

iklan
iklan

Leave a Reply

iklan
error: Content is protected !!