Komunidade ne’ebé hela provizóriu iha Kapela São João Paulo II Tasi-tolu, sesta (9/04/21). Imajen Tatoli/António Gonçalves.

DILI, 11 abríl 2021 (TATOLI)—Governu serbisu hamutuk ho Cruz Vermelha Timor Leste (CVTL), hodi muda vítima inundasaun hosi Masin-Lidun Tasi-tolu ne’ebé refujia iha área Kapela São João Paulo II, ba edifísiu eskola Ensino Basico Filiál (EFB) 1-2 síkulu 05 Kampung Baru, Comoro.

Desizaun Governu hodi muda vítima-sira, tanba konsidera fatin ne’e risku ba dezastre bainhira udan boot, no oras ne’e daudaun mós vítima-sira hela de’it iha lona okos ne’ebé la seguru.

Notísia relevante:CVTL oferese nesesidade bázika ba vítima inundasaun iha Tibar

“Planu Governu, ohin tenke halo mamuk fatin-ne’e, tanba la seguru ba maluk sira iha tempu udan no fó risku boot ba saúde. Ohin ita evakua ba fatin ne’ebé Governu prepara ona,” Jestór Responde emerjénsia CVTL ne’ebé karregadu hanesan Koordenadór ba Sentru Evakuasaun, Filomeno de Araújo, hateten ba jornalista Agência Tatoli, iha Tasi-tolu, sábadu ne’e.

Tuir dadus hosi CVTL, totál uma-kain ne’ebé refujia iha área Kapela São João Paulo II hamutuk 397.

“Totál ema ne’ebé ita rejista iha feto 187, mane 946. Labarik hahú hosi zero to’o tinan-rua  iha feto 59 no mane 57 ho totál 116. Labarik hosi tinan tolu-lima, feto 49 no mane 73 hamutuk 122. Inan fó susu hamutuk 31, inan isin-rua 15, idozu na’in-rua no defisiente na’in-hitu,” nia sita.

Maski nune’e, númeru ne’ebé iha maiória fila ona ba sira-nia uma tanba bee maran ona no mós

iha balun hakarak ba sentru evakuasaun no balun deside hakarak hela nafatin iha área Kapela São João Paulo II. 

Vítima-sira ne’ebé evakua ba edifísiu eskola Ensino Basico Filiál (EFB) 05 Kampung Baru, Comoro hamutuk uma-kain 28, no uma-kain 29 mak deside hela nafatin.

Sira ne’ebé deside hela nafatin iha área Kapela São João Paulo II, CVTL entrega ba Governu atu deside, no sira ne’ebé hili fila ba uma, CVTL entrega kedan nesesidade bázika kada família fos saka ida, super mie kaixa ida, biskuit, mina goreng, masin, masako no susu-been.

Desde 05 abríl, Ministériu Saúde (MS) no Ajénsia internasionál OXFAM fó ona atendimentu saúde ba refujiadu-sira, tanba labarik-sira balun isin-manas no inus-been kauza hosi inundasaun no maioria rekoperadu.

CVTL atribui apoiu umanitáriu tanba serbisu hamutuk ho Governu liu hosi Ministériu Solidariedade Sosiál no Inkluzaun (MSSI), Programa Dezenvolvimentu Nasaun Unida (UNDP), empreza nasionál no privadu-sira inklui pesoál balun.

Jornalista: Arminda Fonseca

Editór: Cipriano Colo

HAKEREK NO HATÁN

Please enter your comment!
Please enter your name here