Enkarregadu Negósiu Misaun Permanente Repúblika Demokrátika Timor-Leste (RDTL) iha Jenebra, Francisco Fernandes. Imajen/facebook.

DILI, 11 abríl 2021 (TATOLI)—Enkarregadu Negósiu Misaun Permanente Repúblika Demokrátika Timor-Leste (RDTL) iha Jenebra, Francisco Fernandes, ho kapasidade nu’udár Prezidente ba Grupu Jenebra apoiu ba Sahara Osidentál, lidera sorumutuk ida ho Alta Komisária Organizasaun Nasaun Unida (ONU) ba Direitu Umanu, Michelle Bachelet.

“Sorumutuk ne’e hala’o iha 08 abríl 2021 iha Jenebra, liu hosi virtuál ho objetivu ko’alia kona-bá protesaun no promosaun direitu umanu iha teritóriu okupadu Sahara Osidentál,” Francisco Fernandes hateten liu hosi nota imprensa, ne’ebé Agência Tatoli simu iha domingu ne’e.

Notísia relevante:TL Kontinua Solidária Povu Sahara Osidentál

Durante sorumutuk, membru Grupu ne’e hato’o sira-nia preokupasaun kona-bá kontinuasaun violasaun direitu umanu, liuliu hasoru feto no labarik, konflitu armadu no esplorasaun ilegál ba rekursu naturál iha teritóriu Sahara Osidentál.

Iha diskusaun ne’e, Alta Komisária ba Direitu Umanu, valoriza kontribuisaun hosi membru grupu-sira no hato’o mós solidariedade ba povu Saharawi.

Aleinde ne’e, Madam Bachelet, reafirma apoiu hosi UNOHCHR no hein ba kooperasaun pragmátika liu tán, hodi promove no proteje direitu umanu.

“Timor-Leste dala ida-tan hato’o kompromisu polítiku naruk ba povu Saharawi, hanesan hatúr ona iha prioridade polítika esterna,” Francisco subliña.

Partisipa iha enkontru ne’e, reprezentante hosi Angola, Algeria, Kuba, Mosambike, Namibia, Venezuela, Áfrika Súl, Uganda, Frente Polizáriu no reprezentante ida hosi Sosiedade Sivíl.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here