Segundu Komandante PNTL Munisípiu Dili, Superintendente Euclides Belo atua ema deskoñesidu ne’ebé tuda ekipa COVID-19, iha Aldeia Kakeu Laran. Imajen Tatoli/ José Belarmino de Sá.

DILI, 11 abríl 2021 (TATOLI)—Ema deskoñesidu hahú lansa fali ona asaun tuda fatuk hasoru ekipa médiku COVID-19. Ba dala ida-ne’e akontese iha Aldeia Kakeu Laran, Suku Becora, Dili.

Iha fulan hirak liu-bá, ema deskoñesidu mós tuda ekipa COVID-19 iha área Caicoli, Dili nian. Iha fali, video balun ne’ebé virál iha rede sosiál Facebook, abitante família-ida iha Postu Administrativu Venilale, Munisípiu Baucau mós la koopera ho ekipa COVID-19 no duni fila ekipa COVID-19, bainhira atu ba foti abitante balun ne’ebé deskonfia pozitivu ba virus ne’e.

Notísia relevante:PNTL ho MTM fahe máskara 1500 iha Merkadu Taibesi

Hosi fali video balun ne’ebé mós virál iha Facebook loron hirak ne’e, iha abitante balun diskute-malu ho ekipa COVID-19, iha izolamentu ne’ebé deskonfia iha Tasi-tolu nian.

Iha domingu ne’e, purvolta tuku 11:04 Otl, ema deskoñesidu tuda tan ekipa COVID-19 bainhira atu ba foti ema balun ne’ebé deskonfia pozitivu COVID-19, iha Aldeia Kakeu Laran, Suku Becora.

Asaun tuda ne’e, ikus-mai la kona ekipa COVID-19, maibé  fatuk kona fali ekipa voluntáriu Mama Bolu (MB) ne’ebé fornese hela bee gratuita ba abitante-sira  iha área refere.

Ekipa Mama Bolu ne’ebé lidera hosi Segundu Komandante PNTL Munisípiu Dili, Superintendente Euclides Belo, lori hela bee-moos hodi oferese ba komunidade afetadu hosi dezastre naturál iha Aldeia Kakeu Laran, Suku Becora. 

Komunidade afetadu ba dezastre Naturál simu ho kontente hetan bee-moos ne’ebé fó gratuitu hosi ekipa Mama Bolu. Tanba durante semana ida ona komunidade labele asesu ba bee-moos.

Kronolojia hosi akontesimentu tuda ekipa Covid-19 ne’e mosu, bainhira asaun karitativa fornesimentu bee-moos husi ekipa Mama Bolu ba komunidade afetadu remata no ekipa Mama Bolu mós hahú retira hosi fatin refere, maibé iha tempu hanesan iha ekipa COVID-19 mós marka prezensa atu evakua vítima pozitivu COVID-19 ne’ebé hela mós iha aldeia Kakeu Laran.

Ho pániku no la simu prezensa hosi ekipa COVID-19 ema koñesidu ataka hodi tuda ambulánsia no ekipa COVID-19. Nune’e, Superintendente Euclides Belo mós hakbesik aan hodi atua situasaun, maibé ema tuda ho fatuk barak konsege kona duni Superintendente Euclides Belo ho ekipa Mama Bolu.

Membru Polísia hosi estasaun Becora mós to’o kedan iha fatin akontesimentu, hodi atua situasaun no tiru teiu hodi fó xamada atu hapara tuda hasoru ekipa COVID-19.

Segundu Komandante Euclides Belo husu ba joven sira atu hakribit violénsia hodi bele fó kontribuisaun ba pás, atu tulun komunidade afetadu ba moras COVID-19 no mós vítima indusaun no rai halai ne’ebé afeta iha Timor-laran tomak.

Superintendente Euclides Belo aviza liuhosi mikrofone ba ema sira ne’ebé tuda, atu kolabora ho serbisu profisionál saúde-sira, luta kontra propagasaun COVID-19 iha bairru, aldeia no suku laran.

“Ha’u husu ba joven sira atu evita kaer fatuk, maibé lolo-liman ba malu atu tulun ema seluk, labele lolon-lima ba fatuk, hodi halo asaun krime hasoru ajente saúde, ajente polísia no mós ekipa Mama Bolu ne’ebé fornese hela bee-moos ba komunidade,” Euclides Belo hateten ho lian makaas iha bairru laran.

Euclides Belo apela ba joven sira atu kontribui ba pás tanba sidadaun see de’it mak halo asaun krime sei regula tuir lei, no sei hatán iha Tribunál kona-bá nia hahalok.

Nia dehan, prezensa ekipa  Mama Bolu atu tulun ema hotu ne’ebé presiza tulun, tan ne’e husu sidadaun hotu bele tulun-malu liu hosi asaun karitativa.

Ekipa Mama Bolu durante ne’e hala’o ona asaun karitativa hodi apoiu bee-moos ba komunidade afetadu ba dezastre naturál hanesan iha bairru Tasi-Tolu, Becora, Aldeia Saun Francisco, Terminal Becora, STM Becora-nia kotuk, Surik Mas no seluk-seluk tan.

“Ekipa Mama Bolu kontinua fó apoiu ba komunidade ne’ebé presiza tebes tulun tuir kbiit ne’ebé ekipa iha,” Euclides Belo haktuir.

Ernestina Lopes Barbosa, nu’udár komunidade Aldeia Kakeu Laran hateten, sente kontente ho apoiu bee moos  hosi ekipa Mama Bolu, maibé nia mós triste ho atuasaun ema deskoñesidu hodi tuda ekipa saúde no ekipa Mama Bolu.

Jornalista: José Belarmino de Sá

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here