Kondisaun abitante Aitarak-laran nia uma hafoin inundasaun, segunda (05/04). Imajen TATOLI/António Gonçalves

DILI, 10 abril 2021 (TATOLI)—Ministru Administrasaun Estatál, Miguel Pereira de Carvalho hateten, ohin, Primeiru-Ministru, Taur Matan Ruak, orienta MAE atu hala’o servisu tuir pontu prinsipál rua mak hamoos lixu iha Sidade Dili no halo levantamentu dadus ba inundasaun ne’ebé kauza hosi udan no anin-boot ne’ebé akontese iha Dili, sábadu-domingu (03-04/04) semana kotuk.

Notísia Relevante: Dezastre naturál, Governu kontinua rekolla dadus

“Ohin ne’e, ita ko’alia pontu prinsipál rua mak PM oriente MAE atu hamoos lixu iha Sidade Dili no rekolla dadus ba afetadu sira. Pontu ida tán mak orienta autoridade komunitária halo limpeza iha sira-nia fatin no parte seluk mak ita sei reforsa hosi empreza timoroan hodi hamoos lixu, rega estrada no rekolla lixu,” Ministru Administrasaun Estatál Miguel Pereira de Carvalho hateten ba jornalista sira, iha Ministériu Finansa, Dili, sábadu ne’e.

Miguel Pereira de Carvalho hatutan, limpeza ne’e autoridade munisipál ho nia kamioneta rasik, maibé presiza tan empreza timoroan sira-nia tulun maibé ne’e autoridade komunitária sira mak sei haree no koordena.

Pontu rua, nia hatutan, ko’alia kona-ba levantamentu dadus ba inundasaun no estragus ne’ebé tuir planu katak autoridade lokál sei aprezenta ba Postu Administrativu no Munisípiu Dili iha semana oin, pelumenus MAE iha ona dadus konsolida ida ba inundasaun ne’ebé akontese iha domingu (04/04) ne’e.

“Purtantu, bazea ba dadus hirak ne’e mak Governu sei foti medida atu bele fó atendementu ba populasaun sira-nia situasaun ne’ebé kauza hosi inundasaun ne’e,” Ministru ne’e hateten.

Nia dehan, dadus ne’ebé mak autoridade komunitária sira rekolla ne’e la’ós ba komunidade afetadu de’it maibé mós ba setór privadu sira. Tanba, setór privadu mós udan-boot ne’e entraga sira-nia sasán, nune’e hein xefe suku sira foti dadus lai, nune’e Governu mós iha dimensaun ida ba dadus.

“Daudaun ne’e MAE prepara formatu tolu hodi fahe ba xefe suku sira. Formatu dahuluk mak ba identifika populasaun sira-ne’ebé sasán lakon. Daruak mak atu identifika infraestrutura ne’ebé estraga no ikus ba setór privadu sira ne’ebé ekipamentu estragus. Xefe Suku sei hatama dadus ba Munisípiu Dili iha semana oin. Nune’e, ita bele hatene nia dimensaun loloos,” nia dehan.

Agora daudaun, nia informa, dadus ne’ebé MAE simu hosi unidade demisaun dezastre naturál ne’ebé nia lidera hamutuk 15.000 mak dezloka no hela iha sentru evakuasaun sira iha Dili, no tuir dadus ema na’in-42 mak mate no na’in haat (4) mak seidauk hatene nia paradeiru.

Kona-ba osan, nia hateten, to’o agora Governu seidauk planea atu finansia ba estragus maibé Governu iha faze diskusaun no oinsá Governu hanoin ajuda saida mak sei fó ba populasaun afetadu sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here